ۇيىمداستىرۋشىلار جاۋاپقا تارتىلادى.
مەيرامحانالاردا، كافەلەردە، دۇكەندەردە، سۇلۋلىق سالوندارىندا، اۆتوسالونداردا جانە كومپيۋتەرلىك كلۋبتاردا تۇنگى تەكسەرۋ جۇرگىزىلدى. مونيتورينگ توپتارىنىڭ وكىلدەرى بۇزۋشىلارعا كارانتين تالاپتارىن ءتۇسىندىردى، دەپ حابارلايدى Almaty-akshamy.kz.
25 تامىزدا قالانىڭ ناۋرىزباي اۋدانىنداعى «سامير» مەيرامحاناسىندا تەكسەرۋشىلەر كوپ قوناق شاقىرىلعان تويدى توقتاتتى. بۇل فاكت بويىنشا ماتەريال جينالدى، ۇيلەنۋ تويىن ۇيىمداستىرۋشىلار جاۋاپقا تارتىلادى.
تامىزدىڭ 24-ىنەن 25-ىنە قاراعان ءتۇنى مونيتورينگ توپتارىنىڭ وكىلدەرى قالانىڭ باس مەملەكەتتىك سانيتارلىق دارىگەرىنىڭ كارانتيندىك تالاپتارى بويىنشا 17 بۇزۋشىلىقتى انىقتادى.
1 قاڭتاردان 25 تامىزعا دەيىنگى ارالىقتا جۇرگىزىلگەن تەكسەرۋلەر 36 228 وبەكتىنى قامتىدى، كارانتيندىك شارالاردى بۇزعان 3390 وبەكتىلەر انىقتالدى. 5457 حاتتاما جاسالدى، ونىڭ ىشىندە زاڭدى تۇلعالارعا شامامەن 199 ملن تەڭگەگە 565 حاتتاما تولتىرىلدى. جەكە تۇلعالارعا قاتىستى ماسكا رەجيمىن بۇزعانى ءۇشىن شامامەن 215 ملن تەڭگەنى قۇرايتىن 4892 حاتتاما جاسالدى.
كارانتين ەرەجەلەرىن جۇيەلى تۇردە بۇزعانى ءۇشىن مامانداندىرىلعان اۋدانارالىق اكىمشىلىك سوتتارعا 75 ءىس جىبەرىلدى، 65 ءىس بويىنشا قىزمەتتى توقتاتۋ تۋرالى شەشىمدەر قابىلداندى. قازىرگى ۋاقىتتا الماتى قالاسىنىڭ سوتتارى تۇراقتى ءتارتىپ بۇزۋشىلارعا قاتىستى 8 ءىستى قاراۋدا.
قالا اكىمدىگى ازاماتتاردى كارانتيندىك شەكتەۋلەردى ساقتاۋعا، رۇقسات ەتىلگەن جۇمىس كەستەسىنەن تىس ويىن-ساۋىق مەكەمەلەرىنە بارماۋعا جانە ماسكا رەجيمىن ۇستانۋعا شاقىرادى.
ايتا كەتەرلىگى، الماتىدا كوروناۆيرۋسقا بايلانىستى جاعداي شيەلەنىسىپ تۇر. 26 تامىزدا كۆي ينفەكسياسىنىڭ 1561 جاڭا جاعدايى تىركەلدى. ينفەكسيالىق ستاسيونارلاردا 5765 ادام بار، ونىڭ 166-سى بالالار. رەانيماسيا بولىمىندە 469 ناۋقاس جاتىر، 26 ادام ءوجج اپپاراتىنا، 196 ادام ءينۆازيۆتى ەمەس ءوجج اپپاراتىنا، 216 ناۋقاس High flow اپپاراتىنا قوسىلعان.
بۇگىندە 12 868 ناۋقاس ۇيدە امسك پەن تەلەمەديسينا ورتالىعىنىڭ ءموبيلدى توپتارىنىڭ باقىلاۋىندا.