قالادا ءىرى سپورت نىساندارى بوي كوتەرەدى
بۇل تۋرالى الماتى قالالىق سپورت باسقارماسىنىڭ باسشىسى رۇستەم بايسەيىتوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى بارىسىندا ايتتى، دەپ حابارلايدى almaty-akshamy.kz.
سپيكەردىڭ ايتۋىنشا، بيىل جابىق سپورتتىق نىسانداردىڭ قۇرىلىسى ەسەلەنگەن. اعىمداعى قۇرىلىستا بۇل وبەكتىلەردىڭ قۋاتتىلىعى تاۋلىگىنە شامامەن 10 مىڭ ادامدى قۇرايدى.
قازىرگى ۋاقىتتا الماتىدا بيۋدجەت قارجىسى ەسەبىنەن جەتى سپورتتىق نىساندا قۇرىلىس-مونتاج جۇمىستارى جۇرگىزىلۋدە، ونىڭ ىشىندە التاۋى - سپورتتىق-ساۋىقتىرۋ كەشەنى مەن تەننيس ورتالىعى.
سونىمەن قاتار، جەكەمەنشىك ۇيىمدار بەس ءىرى سپورت نىساندارىن سالىپ جاتىر: ۇستەل تەننيسى ورتالىعى، سۇڭقار حشتك دەنە شىنىقتىرۋ-ساۋىقتىرۋ كەشەنى، جۇلدىز ىقشاماۋدانىنداعى سپورت كەشەنى، ماي ۆين دەنە شىنىقتىرۋ-ساۋىقتىرۋ كەشەنى، اۋەزوۆ اۋدانىنداعى كۇرەس ورتالىعى. «جان دوسىم» تەننيس ورتالىعى پايدالانۋعا بەرىلدى.
2021 جىلى اۋداندىق اكىمدىكتەر دەنە شىنىقتىرۋ-ساۋىقتىرۋ ورتالىقتارىن ورنالاستىرۋ ءۇشىن قوسىمشا جەر تەلىمدەرىن بەردى. بەرىلگەن 14 ۋچاسكەنىڭ جەتەۋى قالانىڭ كوممۋنالدىق مەنشىگىندە، قالعان جەتەۋى - جەكە مەنشىكتە.
قازىرگى ۋاقىتتا مەملەكەتتىك قوردا ورنالاسقان اۋدانى 0،3-تەن 1 گا دەيىنگى جەتى ۋچاسكە ءۇشىن قالا قۇرىلىسى جانە ۋربانيزم ءبولىمى جوبالىق-سمەتالىق قۇجاتتامانى ازىرلەۋگە كونكۋرس جاريالادى. سونىمەن قاتار، اتلەتيكالىق اۋىلدىڭ ىرگەلەس اۋماعىندا جابىق جەڭىل اتلەتيكالىق مانەج سالۋ جوسپارلانۋدا. قازىرگى ۋاقىتتا جوبالىق-سمەتالىق قۇجاتتامانى ازىرلەۋگە تەندەر وتكىزىلۋدە.
ر. بايسەيىتوۆ اتاپ وتكەندەي، سپورت باسقارماسى 2022-2024 جىلدارعا ارنالعان جالپى سوماسى 3 ميلليارد 83 ميلليون تەڭگەگە قالانىڭ سپورت ۇيىمدارىن قاجەتتى ينۆەنتارمەن جانە قۇرال-جابدىقتارمەن كەشەندى تۇردە كەزەڭ-كەزەڭىمەن جابدىقتاۋ جوسپارىن دايىندادى.