ورتالىقتىڭ قورىندا 1 ميلليون 132 مىڭ ءىس ساقتالعان.
الماتىدا قازاقستان پرەزيدەنتى قاسىم-جومارت توقايەۆ حح عاسىرداعى ساياسي قۋعىن-سۇرگىن ماتەريالدارىن زەرتتەۋ ورتالىعىنىڭ جۇمىسىمەن تانىستى، دەپ حابارلايدى Almaty-akshamy.kz
اقوردانىڭ باسپا ءسوز قىزمەتىنىڭ حابارلاۋىنشا، مەملەكەت باسشىسى ساپارى بارىسىندا قۇجاتتاردى ساقتاۋ شارتتارىمەن، مۇراعاتتىق قۇجاتتاردى رەستاۆراسيالاۋ جانە ميكروفيلمگە ءتۇسىرۋ كابينەتتەرىنىڭ جۇمىسىمەن تانىستى.
سونداي-اق مەملەكەت باسشىسىنا وتكەن عاسىرداعى ساياسي قۋعىن-سۇرگىن تاريحىنا قاتىستى ماتەريالدارمەن جۇمىس جاساۋ ەكسپوزيسياسى ۇسىنىلدى.
پرەزيدەنتتىڭ جارلىعىمەن 2020 جىلدىڭ قاراشاسىندا حح عاسىرداعى ساياسي قۋعىن-سۇرگىن قۇرباندارىن تولىق اقتاۋ جونىندە مەملەكەتتىك كوميسسيا قۇرىلدى. مەملەكەتتىك كوميسسيانىڭ جۇمىسىنا قولداۋ كورسەتۋ ماقساتىندا 2021 جىلى حح عاسىرداعى ساياسي قۋعىن-سۇرگىن ماتەريالدارىن زەرتتەۋ ورتالىعى اشىلدى.
حح عاسىردىڭ 30-50 جىلدارىنداعى ساياسي قۋعىن-سۇرگىن تاريحىنا قاتىستى ماتەريالدار ورتالىققا ءىىم، ۇقك، باس پروكۋراتۋرانىڭ ارناۋلى مۇراعاتتارىنان بەرىلەدى.
ورتالىق تاياۋ ۋاقىتتا بارلىعى 715 مىڭعا جۋىق ءىستى قابىلداپ الادى دەپ جوسپارلانىپ وتىر. مۇندا قۇجاتتاردى قۇپياسىزداندىرۋ، قالپىنا كەلتىرۋ جۇمىستارى جۇزەگە اسىرىلادى. ولاردى زەرتتەۋ جانە عىلىمي اينالىمعا ەنگىزۋ ءۇشىن ءتيىستى جاعداي جاسالعان.
قازىرگى ۋاقىتتا تاريحشى-عالىمدار مەن ورتالىق قىزمەتكەرلەرى «الاشوردا ءىسى. 1920-1940 جج. قۇجاتتار مەن ماتەريالدار» اتتى كوپتومدىقتى باسپاعا دايىنداپ جاتىر. بۇل باسىلىم حح عاسىرداعى قازاقستاننىڭ ساياسي تاريحىنىڭ عىلىمي كوكجيەگىن كەڭەيتەدى.