الماتىدا قۇرىلىس الاڭىنا ۇرلىققا تۇسكەن كۇدىكتىلەر ۇستالدى

الماتى پوليسەيلەرى قۇرىلىس الاڭىندا بولعان ۇرلىق قىلمىسىنىڭ بەتىن اشتى.

ۇستالعان كۇدىكتىلەردىڭ ۇرلىقتىڭ 7 دەرەگىنە قاتىسى بار ەكەنى انىقتالدى، دەپ حابارلايدى Almaty-akshamy.kz

Polisia.kzء-تىڭ دەرەگىنشە، جەرگىلىكتى تۇرعىن اۋەزوۆ اۋداندىق پوليسيا باسقارماسىنا ارىزبەن جۇگىنگەن. ونىڭ ايتۋىنشا، تۇندە بەلگىسىز بىرەۋلەر تۇرعىن ۇيلەردىڭ ءبىرىنىڭ قۇرىلىس الاڭىنان قۇرىلىس ماتەريالدارىن ۇرلاپ كەتكەن.

«بۇل دەرەك سوتقا دەيىنگى تەرگەۋدىڭ ءبىرىڭعاي تىزىلىمىنە ق ر قك-نىڭ 188-بابى (ۇرلىق) بويىنشا تىركەلدى. العاشقى جەدەل جانە تەرگەۋ ءىس-شارالارىنىڭ ناتيجەسىندە كۇدىكتى قاسكويلەر انىقتالىپ، ۇستالدى. ولار 23 جاستاعى جىگىتتەر بولىپ شىقتى. كەيىن بەلگىلى بولعانداي، ەكى دوس وسىلايشا ءناپاقاسىن تاۋىپ جۇرگەن. مىسالى، بازارلاردىڭ بىرىندە ولار نوۋتبۋك ۇرلاپ كەتكەن. كۇدىكتىلەر قىلمىسىن مويىندادى. ولاردىڭ وسىعان ۇقساس 7 قىلمىسقا قاتىسى بار ەكەندىگى بەلگىلى بولدى. ۇستالعاندار ۋاقىتشا ۇستاۋ يزولياتورىنا قاماۋعا الىندى»، – دەدى اۋەزوۆ اۋداندىق پوليسيا باسقارماسىنىڭ باستىعى ۇلان ءابىلقايىر.

سونداي-اق پوليسيادا ق ر قپك-نىڭ 201-بابىنا سايكەس وزگە اقپاراتتار تەرگەۋ مۇددەسىنە وراي جاريالاۋعا جاتپايتىنىن ايتىلدى. ق ر كونستيتۋسياسىنىڭ 77-بابىنىڭ 3-تارماعىنىڭ 1-تارماقشاسىنا جانە ق ر قپك-نىڭ 19-بابى 1-بولىگىنە سايكەس، زاڭدى كۇشىنە ەنگەن سوت ۇكىمىمەن بەلگىلەنگەنگە دەيىن ءاربىر ادام قىلمىستىق قۇقىق بۇزۋشىلىق جاساۋدا كىناسىز دەپ تانىلادى.