كەزدەسۋ بارىسىندا مەملەكەت باسشىسىنا ەۋرازيالىق دامۋ بانكى (ەدب) جۇمىسىنىڭ ناتيجەلەرى جانە قازاقستانمەن ىنتىماقتاستىقتى ودان ءارى جالعاستىرۋ جوسپارى، سونداي-اق بانكتىڭ الداعى كەزەڭگە ارنالعان بولجامدارى جونىندە مالىمەت بەرىلدى.
بيىل بانك ەلىمىزگە 1،1 ميلليارد دوللاردان اسا قارجى قۇيۋعا جانە حالىقارالىق ينۆەستيسيالاردىڭ قازاقستاندىق جوبالارعا تارتىلۋىنا ىقپال ەتۋگە نيەتتى. كولىك ينفراقۇرىلىمى جانە لوگيستيكا، ونەركاسىپ، اگروونەركاسىپ كەشەنى، جاسىل ەنەرگەتيكا جانە سۋ رەسۋرستارى سەكىلدى سالالارعا باسىمدىق بەرىلەدى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
نيكولاي پودگۋزوۆ بىلتىر ەۋرازيالىق دامۋ بانكى قازاقستانعا قۇيىلعان ينۆەستيسيا مولشەرىن 2021 جىلمەن سالىستىرعاندا 5 ەسە ءوسىرىپ، 1،2 ميلليارد دوللارعا جەتكىزگەنىن، بارلىق جوسپارلى كورسەتكىشتەردى اسىرا ورىنداعانىن ايتتى.
سونىمەن قاتار مەملەكەت باسشىسىنا ەلارالىق ينتەگراسيالىق جوبالاردىڭ جۇزەگە اسىرىلۋ بارىسى جونىندە باياندالدى. اتاپ ايتقاندا، اياگوز – باقتى تەمىرجول جەلىسىنىڭ جانە قازاقستان مەن جۇڭگو اراسىنداعى شەكارا وتكەلىنىڭ قۇرىلىسى، سونداي-اق استراحان – ماڭعىشلاق سۋ قۇبىرىن جاڭعىرتۋ سياقتى جوبالار.
بۇدان بولەك، پرەزيدەنتكە ەدب باسقارما ءتوراعاسى بيىل 15-17 مامىر كۇندەرى الماتىدا وتەتىن ازيا-تىنىق مۇحيتى ايماعىنىڭ دامۋ ينستيتۋتتارى قاۋىمداستىعىنىڭ (ADFIAP) كەزدەسۋىنە دايىندىق بارىسىن باياندادى. جيىنعا الەمنىڭ 40 ەلىنەن 80-نەن استام دامۋ ينستيتۋتى، سونداي-اق حالىقارالىق قۇرىلىمدار، قازاقستان مەن ورتالىق ازيا ەلدەرىنىڭ سالالىق مينيسترلىكتەرى قاتىسىپ، ەلىمىزدىڭ جانە ەۋرازيالىق ەكونوميكالىق وداققا مۇشە مەملەكەتتەردىڭ ەكونوميكاسىنا ينۆەستيسيا قۇيۋ ماسەلەلەرىن تالقىلايدى.
قاسىم-جومارت توقايەۆ ينتەگراسيالىق ۇدەرىستەردە ەۋرازيالىق دامۋ بانكىنىڭ بەلسەندى ءرول اتقاراتىنىناتاپ ءوتتى. ونىڭ ايتۋىنشا، بانكتىڭ ينفراقۇرىلىمدى جاڭعىرتۋ جانە سالۋ جونىندەگى جوبالارعا قاتىسۋى قازاقستان ەكونوميكاسىنىڭ دامۋىنا ايتارلىقتاي ۇلەس قوسادى.