مەملەكەت باسشىسى قاسىم-جومارت توقايەۆ ۇلتتىق قۇرىلتايدىڭ ءۇشىنشى وتىرىسىنداعى سوزىندە مەملەكەتتىك رامىزدەرگە قاتىستى قاۋەسەتكە جاۋاپ بەردى.
ۇلتتىق بىرەگەيلىگىمىز مەملەكەتتىك رامىزدەردە ايقىن كورىنىس تاپقان. مەن بىلتىر ايماقتاردىڭ نىشانىن، ياعني سيمۆوليكاسىن جۇيەلەپ، ءبىرىڭعاي ستاندارتقا كەلتىرۋ قاجەتتىگىن ايتتىم. نىشانداردان سول ءوڭىردىڭ ەرەكشەلىگىمەن قاتار، ەلىمىزدىڭ ءبولمىس-بىتىمى دە بايقالۋعا ءتيىس. ءقازىر وسى باعىتتا ناقتى جۇمىس جاسالىپ جاتىر. بۇعان ماماندار، ساراپشىلار جانە بەلسەندى ازاماتتار اتسالىسۋدا. سونىمەن قاتار ولار مەملەكەتتىك نىشاندارىمىزدى تۇگەل جاڭعىرتۋ تۋرالى پىكىر ايتىپ جاتقانىن بىلەمىن – دەدى ول.
ءبىزدىڭ كوك تۋىمىزدا ءمىن جوق. وندا ەلىمىزدىڭ بىرەگەي بولمىسى ناقتى بەينەلەنگەن.
ءانۇرانىمىز دا ناعىز ۇلتتىق رۋحتى پاش ەتەدى. قازاقتىڭ ءانۇرانى الەمنىڭ ءار تۇكپىرىندە شىرقالىپ ءجۇر. جاڭا جىلدى جاقىندارىمىزدىڭ ورتاسىندا انۇرانمەن قارسى الۋ جاقسى داستۇرگە اينالدى. ءبىر سوزبەن ايتساق، ءانۇرانىمىزدىڭ ءسوزى دە، اۋەنى دە حالىقتىڭ جۇرەگىنە ابدەن ورنىققان. ال ەلتاڭبامىزعا قاتىستى سىني پىكىرلەر ايتىلىپ قالادى. ونى كەڭەس زامانىنداعى گەربكە ۇقساتىپ جاتادى. تىم ەكلەكتيكالىق، كۇردەلى دەيدى. مۇنداي ويدى ەل ىسىنە بەي-جاي قارامايتىن بەلسەندى ازاماتتار عانا ەمەس، ماماندار دا ايتىپ ءجۇر. ورىندى پايىمدار ەسكەرۋسىز قالماۋى كەرەك. ورتاق كەلىسىمگە كەلگەن جاعدايدا ارناۋلى كوميسسيا قۇرۋعا بولادى. بۇل كوميسسيا ماسەلەنى جان-جاقتى قاراستىرىپ، قوعامدىق تالقىلاۋ وتكىزەدى. سوسىن قازاقستاننىڭ جاڭا ەلتاڭباسىنىڭ جوباسىن جاساۋعا اشىق بايقاۋ جاريالانادى – دەدى توقايەۆ.