الماتى قالاسى مەدەۋ اۋدانى اكىمدىگىنىڭ عيماراتىندا كوپبالالى جانە جالعىزباستى انالارعا سەرتيفيكات تابىستالدى. بۇل سەرتيفيكات بويىنشا ۇلكەن وتباسىنىڭ بۇلدىرشىندەرى بالاباقشاعا تەگىن بارا الادى.
يگى ءىس-شارا ناۋرىز مەرەكەسىنىڭ «قايىرىمدىلىق» كۇنىنە وراي وتكىزىلدى. سەرتيفيكاتتاردى تابىستاۋ راسىمىنە مەدەۋ اۋدانى اكىمىنىڭ ورىنباسارى ايدوس نۇرلىبايەۆ، مەدەۋ اۋداندىق پروكۋراتۋراسىنىڭ پروكۋرورى ەلجاس بوزبايەۆ، جەكەمەنشىك بالاباقشالاردىڭ وكىلدەرى مەن اتا-انالار قاتىستى.
- مەملەكەت باسشىسى قاسىم-جومارت توقايەۆتىڭ تاپسىرماسى بويىنشا ناۋرىز مەيرامى جاڭا فورماتتا تويلاناتىن بولدى. وسى ونكۇندىكتىڭ بۇگىنگى «قايىرىمدىلىق كۇنىنە» وراي ءبىز اۋداندىق اكىمدىك ءوتىنىش بەرگەن 15 كوپبالالى جانە جالعىزباستى اناعا سەرتيفيكات تابىستادىق.
بۇل اكسياعا كومەكتەسكەن كاسىپكەرلەرگە العىس ايتامىن. جۇمىلا كوتەرگەن جۇك جەڭىل دەيدى. 1 جىل بولسىن تەگىن بالاباقشاعا بارۋ اتا-انالارعا ۇلكەن كومەك بولادى دەپ ۇمىتتەنەمىن، – دەدى مەدەۋ اۋدانى اكىمىنىڭ ورىنباسارى ايدوس نۇرلىبايەۆ.
