ەسىرتكىمەن كۇرەس بەلسەندى جۇرگىزىلمەسە، ەرتەڭ ءبارى كەش بولۋى مۇمكىن – مەملەكەت باسشىسى

بۇل تۋرالى مەملەكەت باسشىسى قاسىم-جومارت توقايەۆ ۇلتتىق قۇرىلتايدىڭ ءۇشىنشى وتىرىسىنداعى سوزىندە ايتتى، دەپ حابارلايدى اقوردانىڭ باسپا ءسوز قىزمەتى. 

ءبىز جاقسىلىققا جەتەمىز دەسەك، جاعىمسىز ادەتتەردەن ارىلۋىمىز كەرەك. جاقسىدان ۇيرەنىپ، جاماننان جيرەنە ءبىلۋىمىز قاجەت. ياعني، شىن مانىندە وزىق ۇلت بولۋ ءۇشىن جاقسىلىققا ۇمتىلۋمەن قاتار، ەلىمىزدىڭ وسىپ-وركەندەۋىنە كەدەرگى بولاتىن جامان ادەت، جاعىمسىز قىلىق جانە ءقاۋىپتى كەسەلدەن قۇتىلۋىمىز كەرەك. بۇل – ۇلتتىڭ جاڭا ساپاسىن قالىپتاستىرۋ جولىنداعى وتە ماڭىزدى قادام – دەدى قاسىم-جومارت توقايەۆ.

ۇلى اباي «بەس نارسەدەن قاشىق بول، بەس نارسەگە اسىق بول» دەگەن. بۇل – ارينە، ەشقاشان ەسكىرمەيتىن، ءمان-ماڭىزىن جوعالتپايتىن وسيەت. ءبىراق ءار زاماننىڭ وزىنە ءتان سىن-قاتەرلەرى بار. جاھاندانۋ ۇردىسىنە، جاڭا تەحنولوگيانىڭ دامۋىنا جانە باسقا دا سەبەپتەرگە بايلانىستى قوعامعا ءقاۋىپتى جاڭا كەسەلدەر پايدا بولدى. اسىرەسە، ءبىز مىناداي بەس كەسەلمەن بۇكىل ەل بولىپ كۇرەسىپ، ءبىرجولا توسقاۋىل قويۋىمىز كەرەك. الدىمەن، ەسىرتكى ساۋداسى، سونىڭ ىشىندە سينتەتيكالىق ەسىرتكى اينالىمى. وكىنىشكە قاراي، بۇل ىندەت جاپپاي بەلەڭ الىپ بارادى. تەك بىلتىردىڭ وزىندە ەسىرتكىگە قاتىستى 7،5 مىڭنان استام قىلمىس انىقتالدى. زاڭسىز اينالىمنان 41 توننا ەسىرتكى الىندى. ناشاقورلىق، اسىرەسە، بالالار اراسىندا تەز تارالىپ، جاستارىمىز ۋلانىپ جاتىر. ەسىرتكىمەن كۇرەس بەلسەندى جۇرگىزىلمەسە، ەرتەڭ ءبارى كەش بولۋى مۇمكىن – دەدى مەملەكەت باسشىسى.