مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن كەڭەسىندە كاسىپكەرلەرگە ارناپ «الەۋمەتتىك ليفت» تەتىگىنىڭ ۇلگىسىندەگى «ەكونوميكالىق ليفت» ۇعىمىن ەنگىزۋدى تاپسىردى، دەپ حابارلايدى Almaty-akshamy.kz.
«الەۋمەتتىك ليفت» دەگەن ۇعىمنىڭ نە ەكەنى بارشاعا ايان. بۇل – كەز كەلگەن باستاماشىل جانە ەڭبەكقور ادام مانساپ ساتىسىندا جانە قوعامدىق يەرارحيادا سەنىمدى تۇردە العا جىلجي الاتىن جۇيە. سول سياقتى، ءبىز كاسىپكەرلەرگە ءتيىمدى جۇمىس ىستەيتىن «ەكونوميكالىق ليفت» ورناتۋىمىز كەرەك»، - دەدى قاسىم-جومارت توقايەۆ.
سونداي-اق، پرەزيدەنت وڭىرلەردە تابىستى ەڭبەك ەتىپ جۇرگەن كاسىپكەرلەرگە جول اشۋدى تاپسىردى.
«سوندىقتان جۇيەلىك شارالاردان باسقا، ايماقتىق اۋقىمداعى ەڭ تابىستى جانە ادال كاسىپكەرلەردى ىلگەرىلەتۋ ماڭىزدى. ولار جاڭا، ءادىل ەكونوميكانى دامىتۋدىڭ لوكوموتيۆىنە اينالۋى كەرەك»، - دەدى مەملەكەت باسشىسى.
ايتا كەتەيىك، ۇكىمەت ۇيىندە پرەزيدەنتتىڭ توراعالىعىمەن ەلدىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس ءوتىپ جاتىر.