قوسىمشا قارجى تەك قانا كوممۋنالدىق ينفراقۇرىلىمدى جاڭعىرتۋعا جۇمسالۋى كەرەك. بۇل تۋرالى ەلدىڭ الەۋمەتتىك-ەكونوميكالىق ماسەلەلەرى جونىندەگى كەڭەيتىلگەن كەڭەستە مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz. قازاقپاراتقا سىلتەمە جاساپ.
«ءتاريفتى وسىرۋدەن تۇسكەن قوسىمشا قارجى تەك قانا كوممۋنالدىق ينفراقۇرىلىمدى جاڭعىرتۋعا جۇمسالۋى كەرەك. سونداي-اق جاڭا قۋات كوزدەرىن ىسكە قوسۋعا جانە جۇمىسشىلاردىڭ جالاقىسىن كوتەرۋگە باعىتتالۋى قاجەت. مونوپوليستەردىڭ مىندەتى مۇقيات ناقتىلانىپ، تولىعىمەن ورىندالۋى ءتيىس. سوندىقتان ۇكىمەتكە قارجىنىڭ جۇمسالۋىن باقىلايتىن قاتاڭ امال-تاسىلدەر ەنگىزۋدى تاپسىرامىن. وعان سيفرلىق باقىلاۋ جۇيەسىن دە ەنگىزۋ كەرەك»، – دەدى قاسىم-جومارت توقايەۆ.
وسى ورايدا پرەزيدەنت بۇل سالاداعى قاراجاتتىڭ يگەرىلۋىن قاتاڭ باقىلاۋ كەرەك ەكەنىن ايتتى.
«جۇرت كوممۋنالدىق قىزمەت ءۇشىن تولەگەن اقشاسىنىڭ قايدا كەتىپ جاتقانىن كورىپ وتىرۋى ءتيىس. قازىرگى زامانعى اقپاراتتىق تەحنولوگيا بۇعان تولىق مۇمكىندىك بەرەدى»، – دەدى مەملەكەت باسشىسى.