قاسىم-جومارت توقايەۆ زاڭسىز دەمونستراسياعا شىعاتىندارعا ەسكەرتۋ جاسادى
انالار قوعام الدىندا ءوز جاۋاپكەرشىلىگىن تەرەڭ سەزىنۋى كەرەك. بۇل تۋرالى قازاقستان حالقى اسسامبلەياسىنىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«شىن مانىندە، انا دەگەنىمىز - وتباسىنىڭ ۇيىتقىسى، انانىڭ ورنى ەرەكشە. ونى ءبارىمىز دە بىلەمىز. سوندىقتان ءبىز قوعامدا اناعا دەگەن قۇرمەتتى وتە جوعارى قويۋىمىز كەرەك. سونىمەن قاتار انالار دا قوعام الدىندا ءوز جاۋاپكەرشىلىگىن تەرەڭ سەزىنۋى كەرەك. كەيبىر كوپ بالالى انالارىمىز زاڭسىز شەرۋلەرگە شىعىپ، ايقاي-شۋ كوتەرىپ، قوعامدىق ءتارتىپتى بۇزىپ وتىر»، - دەدى مەملەكەت باسشىسى.
ق ر پرەزيدەنتى ماسىلدىقتى قوعامنىڭ وزەكتى، ءتىپتى ساياسي پروبلەماسى دەپ اتاۋعا بولاتىندىعىن باسا ايتتى.
«ءبىز «بەيبىت جينالىستار تۋرالى» وتە جاقسى زاڭ قابىلدادىق. كىم نە ايتسا دا، بۇل - دەموكراتيانى دامىتۋ جولىنداعى ماڭىزدى قادام. بەيبىت جينالىستار مەن دەمونستراسيالارعا ەشكىم دە كەدەرگى كەلتىرمەيدى. وندا ءبارى جازىلعان. رەسمي رۇقسات الۋ قاجەت. بۇل جينالىستار، دەمونستراسيالار حابارلاندىرۋ رەجيمىندە دە وتكىزىلە الادى. ءبىراق، وسىناۋ بولماشى تالاپتى كەيبىر ازاماتتار بۇزۋعا بولادى دەپ ەسەپتەيدى. وسى تەكتەس ارەكەتتەرگە قۇقىقتىق باعا بەرىلەدى. باس پروكۋرتۋرانىڭ مىندەتى - ازاماتتارىمىزعا وسى زاڭدى ءتۇسىندىرۋدى جالعاستىرۋ، ال بارلىق قۇقىق قورعاۋ ورگاندارىنىڭ مىندەتى قوعامدىق ءتارتىپتى، زاڭنامامىزعا سايكەس قولداۋ»، - دەدى قاسىم-جومارت توقايەۆ.