ءبىلىم جانە عىلىم مينيسترلىگى بۇكىل الەمدەگى كوپتىلدىلىك تاجىريبەسىن تىڭعىلىقتى زەردەلەۋى ءتيىس. بۇل تۋرالى قازاقستان حالقى اسسامبلەياسىنىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
«شىندىعىندا دا ءبىزدىڭ مەكتەپ تۇلەكتەرىمىز قازاقستاندىق قوعامعا كىرىكتىرىلۋى ءتيىس. ولار باسەكەگە قابىلەتتى بولۋى قاجەت. بۇل ءۇشىن ولار مەملەكەتتىك ءتىلدى دە، انا ءتىلىن دە جانە مۇمكىندىگىنشە ورىس ءتىلىن دە ءبىلۋى كەرەك. تولىقتاي العاندا، بالالارىمىزدىڭ بىرنەشە ءتىلدى بىلگەنى وزدەرىنە جاقسى. ولاردى ءبىر تىلمەن عانا شەكتەۋگە بولمايدى. سول ارقىلى ءبىز ءىس جۇزىندە ولاردىڭ بولاشاق دامۋىن، بولاشاقتاعى بىرىگۋىن شەكتەيتىن بولامىز. تۇپتەپ كەلگەندە، بولاشاعىنىڭ امان-ەسەن بولۋىنان ايىرامىز. سوندىقتان ءبىلىم جانە عىلىم مينيسترلىگى بۇكىل الەمدەگى كوپتىلدىلىك تاجىريبەسىن تىڭعىلىقتى زەردەلەۋى جانە ونى ءبىزدىڭ ۇلتتىق توپىراعىمىزعا ءسىڭىرۋى كەرەك»، - دەدى قاسىم-جومارت توقايەۆ.