جوو رەكتورى دج. پاۋندەر الماتى اكىمى باقىتجان ساعىنتايەۆقا ۋنيۆەرسيتەت بازاسىن تەز ارادا قۇرۋعا ىقپال ەتكەنى ءارى جەكە قولداۋ كورسەتكەنى ءۇشىن العىس ايتتى، دەپ حابارلايدى almaty-akshamy.kz
الماتى اكىمى باقىتجان ساعىنتايەۆ De Montfort University Kazakhstan ۋنيۆەرسيتەتىنىڭ رەكتورى دجەيمس پاۋندەرمەن كەزدەستى. تاراپتار جۇمىستىڭ پەرسپەكتيۆالىق جوسپارلارىن تالقىلادى. ماسەلەن، وقۋ باعدارلاماسىنا ات، كرەاتيۆتى يندۋستريا بويىنشا ماماندىقتار ەنگىزىلەدى. بۇل باعىتتارعا الماتىنىڭ 2050 جىلعا دەيىنگى دامۋ ستراتەگياسىندا ەرەكشە كوڭىل بولىنگەن.
بۇل - قازاقستاندا وقىتۋعا ليسەنزيا العان جانە ۇزدىك ءبىلىم بەرۋ ستاندارتىن ەنگىزۋ ءۇشىن قۇرىلعان العاشقى شەتەلدىك ۋنيۆەرسيتەت. تۇلەكتەرگە DMU لەستەر ۋنيۆەرسيتەتى (ۇلىبريتانيا) دارەجەسى بەرىلەدى.
«ءبىزدىڭ جاستارىمىز الماتىدان كەتپەي-اق بەدەلدى جوعارى وقۋ ورنىندا جوعارى ءبىلىم الۋ مۇمكىندىگىنە يە بولادى. قىزىعۋشىلىق بىلدىرگەندەر از ەمەس. ءبىرىنشى كۋرسقا 700 تالاپكەر ۇمىتكەر بولدى. باكالاۆرياتقا 145 ستۋدەنت ءتۇستى. كەلەسى جىلدان باستاپ ماگيستراتۋرا اشىلادى»، - دەپ اتاپ ءوتتى باقىتجان ساعىنتايەۆ.
«حالىقارالىق جوعارى وقۋ ورنىنىڭ الماتىدا اشىلۋى مەگاپوليستى الەمدىك ءبىلىم بەرۋ قالالارىنىڭ قاتارىنا قوسادى. الەمگە ايگىلى ۋنيۆەرسيتەتتىڭ قۇرىلۋى التى اي بۇرىن باستالىپ، مىنە اياقتالدى. ءبىر كەزدەرى ارمان بولعان يدەيا جۇزەگە اسىرىلدى»، - دەپ حابارلادى قالا اكىمى باقىتجان ساعىنتايەۆ ءوزىنىڭ Facebook-تەگى پاراقشاسىندا.
De Montfort University Kazakhstan-دا وقىتۋ دارىستەر، بەيرەسمي سەمينارلار، پراكتيكالىق ساباقتار، ماستەر-كلاستار، پىكىرتالاستار جانە ونلاين وقىتۋ ارقىلى جۇزەگە اسىرىلادى. ساباقتاردى حالىقارالىق دەڭگەيدەگى جوعارى بىلىكتى وقىتۋشىلار وتكىزەدى. وقىتۋدا بولاشاق مەنەدجەرلەر مەن كاسىپكەرلەردىڭ پراكتيكالىق داعدىلارىن تەرەڭدەتىپ دامىتۋعا ىقپال ەتەتىن ناقتى بيزنەس-كەيستەر مەن وقۋ تاسىلدەرى قولدانىلادى.
ۋنيۆەرسيتەت باعدارلامالارىنىڭ نەگىزگى مودۋلدەرى: «بيزنەستى قارجىلاندىرۋ پرينسيپتەرى»، «كاسىپورىندى دامىتۋ»، «كاسىبي تابىسقا جەتۋ ءۇشىن ءوزىڭدى تانۋ جانە دامىتۋ»، «ءتۇرلى مادەنيەتتەردەگى بيزنەس»، «ستراتەگيالىق مەنەدجمەنت»، «ۇيىمداستىرۋشىلىق كونتەكستەگى كوشباسشىلىق جانە مادەنيەت»، «جوبالاردى باسقارۋ»، «حالىقارالىق ماركەتينگ».
جالپى، ۋنيۆەرسيتەت الماتىدا 20 ملن دوللار ينۆەستيسيامەن الەمدىك دەڭگەيدەگى جەكە كامپۋستىڭ قۇرىلىسىن باستاۋعا نيەت بىلدىرۋدە.