مەملەكەت باسشىسى قاسىم-جومارت توقايەۆ بالالاردى زورلىق-زومبىلىقتان قورعاۋ، وزىنە-وزى قول سالۋدىڭ الدىن الۋ جانە جالپى بالالار مەن ايەلدەر قۇقىعىن قورعاۋعا قاتىستى قابىلدانعان شارالاردى اتاپ ءوتتى، دەپ حابارلايدى aqshamnews.kz
«بيىل بالالاردى زورلىق-زومبىلىقتان قورعاۋ، وزىنە-وزى قول سالۋدىڭ الدىن الۋ تۋرالى جوسپاردىڭ مەرزىمى دە اياقتالادى. ءبىز ايەلدەر مەن بالالاردىڭ قۇقىعىن قورعاۋ ءۇشىن ناقتى شارالار قابىلدادىق»، – دەدى پرەزيدەنت.
قاسىم-جومارت توقايەۆ وتكەن جىلى بارلىق ايماقتا بالالارعا پسيحولوگيالىق قولداۋ كورسەتەتىن ورتالىقتار اشىلعانىن جانە تۇرمىستىق زورلىق-زومبىلىقپەن كۇرەسكە قاتىستى زاڭدار قابىلدانعانىن اتاپ ءوتتى. بۇل زاڭداردىڭ ناتيجەسىندە احۋال ءبىرشاما جاقسارعانىمەن، كەيبىر شالعاي اۋدانداردا تۇرمىستىق زورلىق-زومبىلىقتىڭ ءالى دە جالعاسىپ جاتقانىن ايتتى. سونداي-اق، جات ءدىني اعىمداردىڭ جەتەگىندە جۇرگەن ادامدار جاعدايدى ودان ءارى قيىنداتاتىنىن ەسكەرتتى.
پرەزيدەنت جەرگىلىكتى بيلىك وكىلدەرى مەن قوعام بەلسەندىلەرىنىڭ تۇرمىستىق زورلىق-زومبىلىقتىڭ الدىن الۋ جۇمىستارىنان شەت قالىپ وتىرعانىن، سونىمەن قاتار، بۇل باعىتتاعى جۇمىستاردىڭ شاشىراڭقى بولىپ تۇرعانىن اتاپ ءوتتى.
«سونىڭ ءبارىن ءبىر جەرگە جيناقتاعان دۇرىس دەپ ويلايمىن. وسىعان وراي، «قازاقستان بالالارى» اتتى ءبىرتۇتاس باعدارلاما قابىلداعان ءجون»، – دەپ قوستى مەملەكەت باسشىسى.
سونىمەن قاتار، مەملەكەت باسشىسى وزىق ويلى ۇرپاق ءوسىرۋ ءۇشىن ءبىلىم مەن تاربيەنىڭ قاتار ءجۇرۋى قاجەتتىگىن اتاپ ءوتتى.
«اشىعىن ايتساق، بالا وقىتۋ ىسىندە بۇعان دەيىن بىلىمگە كوبىرەك نازار اۋدارىلدى. ال ۇرپاق تاربيەسىنە قاتىستى جۇيەلى ۇستانىم بولعان جوق. بۇل سالاعا ءتيىستى دەڭگەيدە كوڭىل بولىنبەي كەلدى. «تاربيەسىز بەرىلگەن ءبىلىم – ادامزاتتىڭ قاس جاۋى». سوندىقتان بىلىممەن قاتار تاربيەگە ايرىقشا نازار اۋدارۋ وتە ماڭىزدى»، – دەپ قورىتىندىلادى قاسىم-جومارت توقايەۆ.