پاريج وليمپياداسىنىڭ قولا جۇلدەگەرلەرى عۇسمان قىرعىزبايەۆ پەن لە الەكساندرا الماتىداعى ەكولوگيالىق مارافون – پلوگگينگكە قاتىستى.
سپورت پەن ەكولوگيا – بىر-بىرىمەن تىعىز بايلانىستى. بۇل قاعيدانى وليمپيادا جۇلدەگەرلەرى ءوز ىسىمەن دالەلدەدى. پاريج وليمپياداسىنىڭ قولا جۇلدەگەرى، دزيۋدوشى عۇسمان قىرعىزبايەۆ “تازا قالا” اكسياسىنا قاتىسىپ، ءوز مەكتەبىنىڭ ماڭىن تازالاۋعا اتسالىستى.
“ۇلى ىستەر كىشكەنتاي قادامنان باستالادى. بۇگىن ءبىز الماتى قالاسىندا “تازا قالا” اكسياسىنا قاتىسىپ، ءوز مەكتەبىمىزدىڭ اينالاسىن تازالادىق. بۇل ءىس وزىمىزدەن كەيىنگى ۇرپاققا ۇلگى بولسا ەكەن دەيمىن”، – دەدى عۇسمان.
لە الەكساندرا دا قورشاعان ورتانى قورعاۋدىڭ ماڭىزدىلىعىن اتاپ ءوتتى. ول بۇل اكسيانىڭ الماتى قالاسىنىڭ تۇرعىندارى ءۇشىن ەرەكشە ءرول اتقاراتىنىن ايتتى:
“الماتى – ءبىزدىڭ ورتاق ءۇيىمىز. مەن بۇل اكسياعا قاتىسىپ جاتقانىما وتە قۋانىشتىمىن. وسىنداي شارالاردى ۇيىمداستىرۋ وتە ماڭىزدى. ەگەر ءاربىر تۇرعىن قالا تازالىعىنا ۇلەس قوسسا، ءومىر ءسۇرۋ الدەقايدا جايلى بولار ەدى. سپورتپەن اينالىسىپ، تازا قالادا سەرۋەندەگەنگە نە جەتسىن!” – دەدى وليمپيادا جۇلدەگەرى.
ەكولوگيالىق مارافون – تەك قالانى تازارتۋ عانا ەمەس، سونىمەن قاتار سالاۋاتتى ءومىر سالتىن ناسيحاتتاۋدىڭ ءبىر جولى. وسىنداي باستامالار ارقىلى تانىمال سپورتشىلار جاستارعا دۇرىس ۇلگى كورسەتىپ، قورشاعان ورتانى قورعاۋعا دەگەن جاۋاپكەرشىلىكتى ارتتىرۋعا ىقپال ەتەدى.بۇل اكسيا – تابيعاتقا دەگەن قامقورلىقتىڭ، بەلسەندى ءومىر سالتىنىڭ جانە بولاشاق ۇرپاققا قالدىرار تازا الەمگە دەگەن نيەتتىڭ كورىنىسى.