ۆەدومستۆولىق (مەكەمەلىك) ماراپاتتاردى رەتكە كەلتىرۋ قاجەت
بۋرابايدا ءوتىپ جاتقان ۇلتتىق قۇرىلتايدا مەملەكەت باسشىسى قاسىم-جومارت توقايەۆ وسى ماسەلەگە توقتالدى، دەپ حابارلايدى aqshamnews.kz.
پرەزيدەنت سوڭعى جىلدارى مەملەكەتتىك ناگرادالار ماسەلەسىن قايتا قارالىپ، ءبىر جۇيەگە تۇسكەنىن ايتتى. الايدا مەكەمەلىك ماراپاتتاردى رەتكە كەلتىرۋ قاجەت دەدى.
«مەملەكەتتىك ورگاندار بۇل جۇمىستى نازاردان تىس قالدىردى. ناقتى ەرەجە جوق، بارىنە ورتاق مالىمەتتەر قورى دا جوق. سونىڭ كەسىرىنەن كەيبىر ماراپاتتار ورىنسىز تاراتىلىپ جاتىر. ءتىپتى، ءبىر مەملەكەتتىك ورگاننىڭ توسبەلگىسىن ءبىر ادام بىرنەشە رەت العان جايتتار دا كەزدەسەدى. ۆەدومستۆولىق ناگرادا – ناعىز بىلىكتى ماماندارعا عانا بەرىلەتىن، سول ارقىلى كاسىبي مارتەبەنى كوتەرەتىن ماڭىزدى ناگرادا. بۇعان بەي-جاي قاراۋعا بولمايدى. سوندىقتان مەكەمەلىك ماراپاتتاردىڭ ءبىرىڭعاي ستاندارتىن جانە ءتىزىمىن جاساۋ قاجەت. ارينە، ءار مەكەمەنىڭ ءوز ەرەكشەلىگىن ەسكەرگەن ءجون. ءبىراق بارىنە ورتاق ۇستانىم بولۋى كەرەك. قۇزىرلى ورگاندارعا وسى شارۋانى قولعا الۋدى تاپسىرامىن»، - دەدى مەملەكەت باسشىسى.