جۋىردا ا.ن. سىزعانوۆ اتىنداعى ۇلتتىق عىلىمي حيرۋرگيا ورتالىعى ەلىمىزدىڭ مەديسينا تاريحىندا تۇڭعىش رەت ءبىر مەزەتتە ءۇش ناۋقاسقا ءۇش دونوردىڭ بۇيرەگىن توعىسپالى ترانسپلانتاسيا تاسىلىمەن سالاتىن اسا كۇردەلى وپەراسيانى ءساتتى وتكىزدى.
Aqshamnews.kz سايتى بۇل تۋرالى وسىعان دەيىن حابارلاعان.
پرەزيدەنت بەلگىلى حيرۋرگ، پروفەسسور بولاتبەك بايماحانوۆتىڭ جەتەكشىلىگىمەن جاسالعان بۇل وپەراسيانى وتاندىق مەديسينانىڭ زور جەتىستىگى رەتىندە باعالاپ، ورتالىق ۇجىمىنا العىس حات جولدادى.
– مەملەكەت دەنساۋلىق ساقتاۋ سالاسىن دامىتۋعا باسا ءمان بەرەدى. بۇل رەتتە كوپتەگەن ىرگەلى باستاما قولعا الىنىپ، اۋقىمدى جۇمىس اتقارىلىپ جاتىر. سونىڭ ناتيجەسىندە ۇلتتىق مەديسينا قارقىندى دامىپ كەلەدى. سىزدەر جاساعان بىرەگەي وپەراسيا – سونىڭ ايقىن دالەلى. ءقازىر ەلىمىز وتە كۇردەلى ترانسپلانتاسيالىق وپەراسيا جاسايتىن الەمدەگى التى مەملەكەتتىڭ قاتارىنا كىرەدى. بۇل جەتىستىككە وتاندىق مامانداردىڭ، سونىڭ ىشىندە وزدەرىڭىزدىڭ قاجىرلى ەڭبەكتەرىڭىز بەن ەرەكشە بىلىمدەرىڭىزدىڭ، سونداي-اق تەڭدەسسىز تاجىريبەلەرىڭىزدىڭ ارقاسىندا جەتىپ وتىرمىز. بارشاڭىزعا شىنايى ريزاشىلىعىمدى بىلدىرەمىن. بولاشاقتا دا ۇلت ساۋلىعىن جاقسارتۋ ءۇشىن تىنىمسىز تەر توگىپ، حالقىمىزعا قالتقىسىز قىزمەت ەتە بەرەسىزدەر دەپ سەنەمىن، – دەلىنگەن العىس حاتتا.
ەسكە سالا كەتەيىك، سول وپەراسيا كەزىندە 12 ساعات بويى مەديسينالىق كورسەتىلىمدەر بويىنشا تۋىستارىمەن ۇيلەسپەيتىن پاسيەنتتەردىڭ اراسىندا ءۇش دونورلىق وپەراسيا جانە ءۇش بۇيرەكتى ترانسپلانتاتتاۋدى جۇرگىزىلدى. بۇل ەل تاريحىنداعى العاشقى ۇشتىك وپەراسيا بولدى.