توقايەۆ ارنايى وتكىزىلگەن دوڭگەلەك ۇستەل بارىسىندا ەلدەگى رەفورما مەن بيزنەس ءۇشىن جاسالىپ جاتقان جاعدايدى بايانداپ بەردى. سونداي-اق سەنىمدى تۇردە قاي سالاعا قاراجات قۇيۋعا بولاتىنىن ايتتى.
«ەلىمىزدىڭ ەنەرگەتيكالىق ستراتەگياسى ءتورت كومپونەنتكە: مۇناي، گاز، كومىر جانە ۋرانعا نەگىزدەلگەن. ءبىز وسى قاعيداتتى بەرىك ۇستانامىز»، – دەدى مەملەكەت باسشىسى.
پرەزيدەنت قازاقستان ەنەرگەتيكالىق رەسۋرستارىن ەكسپورتتاۋ باعىتتارىن ءارتاراپتاندىرۋدى كوزدەيتىنىن جەتكىزدى. بۇدان بولەك ماڭىزدى شيكىزات ماتەريالدارىن يگەرۋدى باسىم باعىت رەتىندە قاراستىراتىنىن ايتتى. قازاقستاندا مىس، ۆولفرام، قورعاسىن، مىرىش، ليتيي، گرافيت جانە جوعارى تەحنولوگياعا اسا قاجەتتى باسقا دا پايدالى قازبالاردىڭ مول قورى بار ەكەنىن ەسكە سالدى.
مەملەكەت باسشىسى Boeing كومپانياسىمەن ىنتىماقتاستىقتى كەڭەيتۋگە جانە تاياۋ جىلدارى جاڭا ۇشاقتار الۋعا نيەتتى ەكەنىن ءبىلدىردى.
امەريكالىق كومپانيالاردى قازاقستاننىڭ اۋىل شارۋاشىلىعى الەۋەتىن بارىنشا پايدالانۋعا شاقىردى.
قاسىم-جومارت توقايەۆ الداعى ءۇش جىلدا قازاقستاندى تولىق سيفرلىق مەملەكەتكە جانە سيفرلىق ترانسفورماسيا مەن جاساندى ينتەللەكت سالاسىندا ەۋرازيادا كوش باستايتىن ءىت-حابقا اينالدىرۋ جوسپارىمەن ءبولىستى.
– قازاقستان گەوگرافيالىق تۇرعىدان سەزىمتال ايماقتا ورنالاسقان. ءبىز ءوزىمىزدىڭ ستراتەگيالىق ماقساتىمىزدان، سونىڭ ىشىندە اقش-پەن تىعىز ىنتىماقتاستىق جاساۋ نيەتىمىزدەن اينىمايمىز. ويتكەنى اقش ءبىزدىڭ تاۋەلسىزدىگىمىزدى الەمدەگى العاشقى ەلدەردىڭ ءبىرى بولىپ مويىندادى جانە ءاردايىم قازاقستاننىڭ ەگەمەندىگى مەن اۋماقتىق تۇتاستىعىن قولداپ كەلەدى. حالقىمىز امەريكانىڭ بۇل ۇستانىمىن شىنايى قۇرمەتتەيدى. ەلىمىزدە جۇرگىزىلىپ جاتقان اۋقىمدى ساياسي-ەكونوميكالىق رەفورمالار، اشىق جانە ينۆەستيسياعا قولايلى ساياسات جۇرگىزۋ ۇستانىمى امەريكالىق كومپانيالاردىڭ قازاقستاندا الاڭسىز بيزنەس جۇرگىزۋىنە كەپىلدىك بەرەدى ءارى ولاردىڭ سەنىمدى، ۇزاق مەرزىمدى سەرىكتەس بولۋىنا مۇمكىندىك جاسايدى، – دەدى قاسىم-جومارت توقايەۆ.