بيىل 20 مىڭنان استام جوبانى سۋبسيديالاۋ جانە 18 مىڭنان استام جوباعا كەپىلدىك بەرۋ جوسپارلانىپ وتىر
ق ر پرەمەر-مينيسترىنىڭ ورىنباسارى – قارجى ءمينيسترى ەرۇلان جاماۋبايەۆ VII «ULTTYQ ONIM» وتاندىق وندىرۋشىلەر كورمەسىندە قۇتتىقتاۋ ءسوزىن سويلەدى، دەپ حابارلايدى Almaty-akshamy.kz.
كورمەنىڭ اشىلۋىنا الماتى قالاسىنىڭ اكىمى ەربولات دوسايەۆ، «بايتەرەك» ۇبح» اق باسقارما ءتوراعاسى قانات شارلاپايەۆ، «دامۋ» كاسىپكەرلىكتى دامىتۋ قورى» اق باسقارما ءتوراعاسى گاۋحار بورىبايەۆا، ق ر پارلامەنتىنىڭ دەپۋتاتتارى مەن بيزنەس وكىلدەرى قاتىستى.
ءوز سوزىندە ە. جاماۋبايەۆ ۇكىمەتتىڭ ستراتەگيالىق ماقساتى ەكونوميكاداعى شاعىن جانە ورتا بيزنەستىڭ ۇلەسىن 2030 جىلعا قاراي 40%-عا دەيىن ۇلعايتۋ ەكەنىن اتاپ ءوتتى. وسىعان بايلانىستى رەسپۋبليكادا بيزنەس اشىپ، ونى جۇرگىزۋ ءۇشىن بارلىق قاجەتتى جاعداي جاسالىپ جاتىر. ۇلتتىق جوبالار اياسىندا پايىز مولشەرلەمەلەرى سۋبسيديالانىپ، نەسيە بويىنشا كەپىلدىك جانە جەڭىلدىكپەن قارىز بەرىلەدى، سونداي-اق باسقا دا قولداۋ شارالارى كورسەتىلەدى.
اتاپ ايتقاندا، مونو-، شاعىن قالالار مەن اۋىلدىق ەلدى مەكەندەردە نەگىزگى قارىز الۋشىعا 5% مولشەرلەمە بويىنشا جەڭىلدىكپەن شاعىن نەسيە بەرۋ ەنگىزىلدى، ال شاعىن جانە ورتا بيزنەس نىساندارىن مەملەكەتتىك قولداۋ شارالارىمەن اۋقىمدىراق قامتۋ ءۇشىن نەسيە بەرۋدىڭ ەڭ جوعارى سوماسى 7-دەن 3 ملرد تەڭگەگە دەيىن تومەندەتىلدى.
سونىمەن قاتار «قاراپايىم زاتتار ەكونوميكاسى» باعدارلاماسى جۇزەگە اسىرىلىپ جاتىر. ونىڭ اياسىندا ءبىرقاتار ماڭىزدى قىزمەت ءتۇرى بويىنشا پايىز مولشەرلەمەسىن سۋبسيديالاۋ مەرزىمى 5 جىلدان 7 جىلعا دەيىن ۇزارتىلدى، ال وڭدەۋ ونەركاسىبىن دامىتۋدى كەڭەيتۋ ماقساتىندا مەملەكەتتىك قولداۋ كورسەتۋ ءۇشىن قىزمەت تۇرلەرىنىڭ تىزبەسى 151-دەن 267-گە دەيىن كوبەيتىلدى.
سونىمەن قاتار «بيزنەستىڭ جول كارتاسى» باعدارلاماسىن قارجىلاندىرۋ جىلىنا 224 ملرد تەڭگەگە دەيىن ۇلعايتىلدى.
«دامۋ» قورىنا كەلەتىن بولساق، شاعىن جانە ورتا بيزنەستى قولداۋ اياسىندا بيىل 20 مىڭنان استام جوبانى سۋبسيديالاۋ جانە 18 مىڭنان استام جوباعا كەپىلدىك بەرۋ جوسپارلانىپ وتىر. جالپى «دامۋ» قورىنىڭ قۇرالدارى ارقىلى ەل وڭىرلەرىنىڭ بارلىعىندا جالپى 11 ترلن تەڭگەگە جۋىق نەسيە سوماسىنا كاسىپكەرلەردىڭ 187،5 مىڭنان استام جوباسىنا قولداۋ كورسەتىلدى.
جاپپاي كاسىپكەرلىكتى قولداۋ بويىنشا باسقا دا شارالار قابىلدانىپ جاتىر. ماسەلەن، جاڭا رەتتەۋشىلىك ساياسات ەنگىزىلۋدە. بيىلعى قاڭتار ايىنان باستاپ بيزنەسكە قويىلاتىن مىندەتتى تالاپتار ءتىزىلىمى جاريالاندى. ەندى تىزىلىمدە جوق تالاپتار بويىنشا تەكسەرۋ جۇرگىزىلمەيدى.
سونىمەن قاتار بيىل زاڭنامادان بيزنەسكە قويىلعان 10 مىڭ ارتىق تالاپ الىنباق. بۇل تەكسەرۋ سانىن ايتارلىقتاي ازايتادى. وسى ورايدا جىل سوڭىنا دەيىن تاۋەكەلدەردى باسقارۋ جۇيەسىن اۆتوماتتاندىرۋ تولىق اياقتالاتىن بولادى.
وعان قوسا بيزنەس-قوعامداستىقپەن بىرلەستىكتە جاڭا سالىق كودەكسىنىڭ جوباسى بويىنشا جۇمىس ءجۇرىپ جاتىر. پارلامەنتكە بيزنەستى جۇرگىزۋ ءۇشىن جاعدايدى جاقسارتۋعا باعىتتالعان زاڭنامالىق تۇزەتۋلەردىڭ 9-شى پاكەتى ەنگىزىلدى.
«ۇكىمەت پەن بيزنەس اراسىندا جۇيەلى جانە سىندارلى ديالوگ ورناتىلدى. پرەزيدەنتتىڭ تاپسىرماسى بويىنشا قۇرىلعان بيزنەسپەن ديالوگ جۇرگىزەتىن الاڭ – “وتاندىق كاسىپكەرلەر كەڭەسى” دە جوعارى تيىمدىلىك كورسەتۋدە»، — دەدى ەرۇلان جاماۋبايەۆ.