كۇدىكتىلەردى قالانىڭ ءار جەرىندە جەكە-جەكە ۇستادى
4 مامىردا جەتىسۋ وبلىسى تەكەلى قالاسىندا پوليسەيلەر ارنايى وپەراسيا جۇرگىزىپ، وڭىردەگى ەسىرتكى تاراتۋ ارناسىڭ جويدى، دەپ حابارلايدى Almaty-akshamy.kz.
وپەراسيا بارىسىندا 4 ەسىرتكى ساتۋشى انىقتالىپ، ماريحۋانانىڭ ءار ءتۇرلى دوزاسىن ساتۋ كەزىندە ۇستالدى.
«ۇستالعان ادامدار ەسىرتكى زاتتارىن تاراتۋ جانە ساتۋ قىلمىستارى بويىنشا ايىپتالادى. كۇدىكتىلەردىڭ ءارقايسىسىڭ قالانىڭ ءار جەرىندە جەكە-جەكە ۇستادى. بارلىعى ۋاقىتشا ۇستاۋ يزولياتورىنا قامالدى. تىركەلگەن فاكتىلەر بويىنشا تەرگەۋ امالدارى ەسىرتكى زاتتاردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋدى كوزدەيتىن ق ر قك-نىڭ 297-بابىنا (1،3-ب.) سايكەس جۇرگىزىلۋدە»، - دەپ حابارلادى جەتىسۋ وبلىسى پد ەسىرتكى قىلمىسىنا قارسى ءىس-قيمىل باسقارماسىنىڭ باستىعى مۇرات جۇمابايەۆ.
جىل باسىنان بەرى وڭىردە زاڭسىز اينالىمنان 30 كەلىدەن استام ءتۇرلى ەسىرتكى زاتتارى تاركىلەندى. ولاردىڭ ىشىندە ماريحۋانا، گاشيش جانە «سينتەتيكا» دەپ اتالاتىن ەسىرتكى زاتتارى بار.