پرەمەر-مينيستر ولجاس بەكتەنوۆ مەملەكەتتىك ساتىپ الۋلار مەن كۆازيمەملەكەتتىك سەكتوردىڭ ساتىپ الۋلارىندا وتاندىق تاۋارلاردىڭ ۇلەسىن ارتتىرا وتىرىپ، ولاردى تۇبەگەيلى جەڭىلدەتۋدى جانە جەدەلدەتۋدى تاپسىردى، دەپ حابارلادى اlmaty-akshamy.kz. 

ۇكىمەت باسشىسى قولدانىستاعى راسىمدەر كوبىنە مەملەكەتتىك ساتىپ الۋلار ۇدەرىسىنىڭ ادەيى كەشىكتىرىلۋىنە اكەلىپ سوقتىراتىنىن، ونىڭ سالدارىنان جاڭا جوبالاردى ىسكە اسىرۋ جانە تۇتاستاي العاندا ەكونوميكانىڭ دامۋى باياۋلايتىنىن اتاپ ءوتتى.

مۇنداي جاعدايدا پارمەندى تۇردە العا جىلجۋ كەرەك. ويتكەنى قازىرگى ساتىپ الۋ جۇيەسى ءبارىن تەجەپ وتىر. كونكۋرستارعا شاعىمدانۋ ءراسىمىنىڭ توڭىرەگىندە تۇتاس استىرتىن بيزنەستەر پايدا بولدى. كەيىن بۇل ماسەلەگە قايتا اينالىپ سوقپاس ءۇشىن ءبىز جاعدايدى تۇبەگەيلى وزگەرتۋىمىز كەرەك، – دەدى ولجاس بەكتەنوۆ ۇكىمەتتەگى كەڭەستە.

بۇل رەتتە ول ءتيىستى ىنتالاندىرۋ تەتىكتەرى ارقىلى ساتىپ الۋلارداعى وتاندىق تاۋارلاردىڭ ۇلەسىن ەداۋىر ارتتىرۋ قاجەتتىگىنە توقتالدى. بۇل – رەسپۋبليكادا ءالى جولعا قويىلماعان جاڭا وندىرىستەردى قولداۋعا دا قاتىستى ماسەلە.

ولجاس بەكتەنوۆ مەملەكەتتىك ورگاندارعا قىسقا مەرزىمدە ساراپشىلارمەن جانە بيزنەس-قوعامداستىقپەن بىرگە قاجەتتى شارالاردى پىسىقتاۋدى، ولاردى پارلامەنت قاراۋىنداعى زاڭنامالىق تۇزەتۋلەرگە ەنگىزۋدى تاپسىردى.

تالقىلاۋ بارىسىندا «اتامەكەن» ۇكپ ءتورالقاسىنىڭ ءتوراعاسى رايىمبەك باتالوۆ اتالعان تاسىلدەردى قولداپ، ولاردى ىسكە اسىرۋ ءۇشىن مينيسترلىكتەرمەن بىرلەسىپ، بەلسەندى جۇمىس ىستەۋگە دايىن ەكەندىگىن جەتكىزدى.

سونداي-اق جيىندا QazTech مەملەكەتتىك باسقارۋدىڭ ءبىرىڭعاي سيفرلىق پلاتفورماسىن ىسكە قوسۋ جانە تۇرعىن ءۇي ساياساتىن رەفورمالاۋ ماسەلەلەرى قارالدى.