مەملەكەت باسشىسى پاۆلودار وبلىسىنىڭ اكىمى اسايىن بايحانوۆتى قابىلدادى

اسايىن بايحانوۆتىڭ مالىمدەۋىنشە  وبلىس ەكونوميكاسىنا 965 ميلليارد تەڭگە ينۆەستيسيا تارتىلعان. بۇل 2022 جىلمەن سالىستىرعاندا 26 پايىزعا كوپ. 

وبلىس اكىمىنىڭ مالىمەتىنشە،  جولاۋشىلار تاسىمالى سەكتورىندا 31 پايىز، ماشينا جاساۋ ىسىندە 13 پايىز، قۇرىلىس سالاسىندا 8 پايىز ءوسىم بايقالادى. 73 شاقىرىمنان استام جىلۋمەن قامتۋ جەلىسىنە رەكونسترۋكسيالاۋ جۇمىستارى جۇرگىزىلگەن.  ەكىباستۇز جىلۋ ەلەكتر ورتالىعىنداعى بارلىق 10 قازاندىق اگرەگات جوندەلگەن.  تەحنيكالىق سۋعا ارنالعان 11 شاقىرىم جاڭا قۇبىر تارتىلىپ، 5،4 شاقىرىم ماگيسترالدى جىلۋمەن قامتۋ جەلىسىنە رەكونسترۋكسيا جاسالعان. 

بۇدان وزگە وبلىستاعى اۋىلداردا ءۇش زاماناۋي مەكتەپتىڭ سالىنۋى اپاتتى جاعدايداعى مەكتەپتەرگە قاتىستى ماسەلەنى شەشۋگە مۇمكىندىك بەرگەن. وڭىردە 54 ءبىلىم بەرۋ ۇيىمى تولىقتاي جاڭعىرتىلعان. ەكى جىل ىشىندە «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 30 جاڭا مەديسينالىق نىسان سالىنادى. 

«وبلىستا قوعامدىق كولىك جۇيەسىن كەزەڭ-كەزەڭىمەن جاڭعىرتۋ جۇمىستارى باستالعان. بىلتىر قالالىق اۆتوبۋس پاركى 130 جاڭا اۆتوبۋسپەن تولىقتىرىلعان. سونداي-اق 722 شاقىرىم اۆتوجول جوندەلگەن. بىلتىر 37 مىڭنان استام حالقى بار 44 اۋىلعا جاڭا سۋ قۇبىرى تارتىلعان. وسىلايشا، وبلىستاعى اۋىل تۇرعىندارىنىڭ 98 پايىزىنا تازا اۋىزسۋ جەتكىزىلگەن» - دەلىنگەن حابارلامادا. 

قاسىم-جومارت توقايەۆ وبلىس اكىمىنە ەرتىس ءوڭىرىن الەۋمەتتىك-ەكونوميكالىق تۇرعىدان ودان ءارى دامىتۋ جونىندە ءبىرقاتار تاپسىرما بەردى.