قازاقستاندا ينتەرنەت پەن الەۋمەتتىك جەلىلەر ارقىلى جاسالاتىن الاياقتىق فاكتىلەرى جيىلەپ كەتكەن.
الماتى پوليسياسى سمارتفونعا «AnyDesk» باعدارلاماسىن جۇكتەمەۋگە شاقىردى، – دەپ حابارلايدى Almaty-akshamy.kz Polisia.kz سايتىنا سىلتەمە جاساپ.
سوڭعى كەزدەرى الماتى قالاسىنىڭ اۋماعىندا جانە جالپى قازاقستان رەسپۋبليكاسىندا ينتەرنەت پەن الەۋمەتتىك جەلىلەر ارقىلى جاسالاتىن الاياقتىق فاكتىلەرى جيىلەپ كەتكەن. سونىمەن قاتار، قاسكويلەر ءارتۇرلى قىلمىستىق تىزبەكتەر بويىنشا ارەكەت ەتەدى، ادەتتە، الەۋمەتتىك جەلىلەردى، WhatsApp، Telegram مەسسەندجەرلەرىن جانە تۇراقتى تەلەفون بايلانىستارىن پايدالانادى.
«تاجىريبە كورسەتكەندەي، كەز كەلگەن ادام الاياقتاردىڭ قۇربانى بولۋى مۇمكىن. دەگەنمەن، ەگدە جاستاعى ادامدار شىعىنعا كوبىرەك ۇشىرايدى. ايتا كەتۋ كەرەك، مۇنداي قىلمىستاردى تەرگەگەن كەزدە تەرگەۋ ورگاندارى قازاقستان رەسپۋبليكاسىنان تىسقارى جەرلەرگە اقشا اۋدارۋ سياقتى ماسەلەلەرگە تاپ بولادى، قاسكويلەر ءبىر رەتتىك ۇيالى تەلەفوندار مەن ابونەنتتىك نومىرلەردى پايدالانادى، ال مۇنداي قىلمىستاردى اشۋ وراسان زور كۇش سالۋدى تالاپ ەتەدى»، – دەدى المالى اۋداندىق پوليسيا باسقارماسىنىڭ باستىعى ەسەن ىسقاقوۆ.
تاجىريبەدە ءجيى كەزدەسەتىن ءبىر مىسال. قاسكوي(لەر) ءوزىن بانكتىڭ قاۋىپسىزدىك قىزمەتكەرى رەتىندە جالعان اتپەن الەۋەتتى جابىرلەنۋشىنىڭ ۇيالى تەلەفونىنا قوڭىراۋ شالىپ، سول ارقىلى سەنىمگە كىرۋگە تىرىسادى. ادەتتە، سويلەۋ مانەرى وتە سىپايى بولادى. سودان كەيىن الاياق جاڭا عانا بەلگىسىز بىرەۋلەر تولەم كارتاسىن رۇقساتسىز بۇزىپ، ودان اقشانى شەشىپ الماق بولعانىن نەمەسە كۇدىكتى ارەكەتتىڭ انىقتالىپ، بىرەۋدىڭ نەسيە الماق بولىپ جاتقانىن حابارلايدى. سوسىن قاسكوي نۇسقاۋلاردى ورىنداۋدى جانە سمس-كودتارىن حابارلاۋدى تالاپ ەتەدى. كورسەتىلگەن سمس ساندار تۇرىندەگى كودتار ارقىلى قاسكويلەر جابىرلەنۋشىنىڭ كارتاسىنان باسقا كارتالارعا اقشا اۋدارادى. تاجىريبە كورسەتكەندەي، اقشا كوبىنەسە رەسەي فەدەراسياسىنا نەمەسە كورشى ەلدەرگە اۋدارىلادى.