الماتىدا پوليسيا، ب ا ق جانە قوعام اراسىنداعى ىنتىماقتاستىقتىڭ جاڭا تاسىلدەرى تالقىلاندى
ءىىم الماتى اكادەمياسىندا بۇقارالىق اقپارات قۇرالدارى، بلوگ-قاۋىمداستىقتار، قوعامدىق ۇيىمدار مەن قازاقستاندىق پوليسيانىڭ ءيميدجىن جاقسارتۋ باعىتىندا جۇمىس ىستەيتىن لاۋازىمدى تۇلعالار قاتىسقان كونفەرەنسيا ءوتتى. شاراعا تەلەارنالاردىڭ، باسپا جانە ينتەرنەت-باسىلىمداردىڭ جۋرناليستەرى، قازاقستان حالقى اسسامبلەياسىنىڭ وكىلدەرى، سونداي-اق ءىىم باسشىلىعى مەن وڭىرلىك پوليسيا دەپارتامەنتتەرىنىڭ ورىنباسارلارى ونلاين رەجيمدە قاتىستى.
كونفەرەنسيا بارىسىندا ءۇش ينستيتۋت اراسىنداعى بايلانىستى جەتىلدىرۋمەن عانا شەكتەلمەي، پروبلەمالىق ماسەلەلەر مەن ولاردى شەشۋ جولدارىنا نازار اۋدارىلدى. قىزۋ تالقىلاۋدا قاتىسۋشىلار زاماناۋي ۇردىستەردى ەسكەرە وتىرىپ، ءوزارا ءىس-قيمىلدى كۇشەيتۋگە، جاڭا بايلانىس ارنالارىن ەنگىزۋگە جانە ازاماتتار ءۇشىن كەرى بايلانىس ورناتۋ مۇمكىندىكتەرىن كەڭەيتۋگە باسا نازار اۋدارۋ قاجەت دەگەن ورتاق پىكىرگە كەلدى.
«ءبىز بۇگىن پوليسيا مەن قوعامنىڭ ءوزارا ارەكەتىن جاقسارتۋ ءۇشىن بارلىق مۇمكىندىكتى پايدالانۋىمىز كەرەك. باستى مىندەتىمىز – ازاماتتاردىڭ وزدەرىن ءقاۋىپسىز سەزىنۋى ءۇشىن سەنىمدى نىعايتۋ جانە ءتيىمدى كوممۋنيكاسيالىق مەحانيزمدەر قۇرۋ»، – دەدى قازاقستان رەسپۋبليكاسى ءىىم الماتى اكادەمياسىنىڭ باستىعى مىندەتىن ۋاقىتشا اتقارۋشى جانات ديلبارحانوۆا.
كونفەرەنسيا قورىتىندىسى بويىنشا قاتىسۋشىلار تۇراقتى بىرلەسكەن ءىس-شارالار وتكىزۋ، پوليسيا قىزمەتكەرلەرىنە ارنالعان ترەنينگتەر ۇيىمداستىرۋ، سونداي-اق قۇقىق قورعاۋ ورگاندارىنىڭ مەديا جانە قوعاممەن جۇمىسىن جەتىلدىرۋگە باعىتتالعان كوممۋنيكاسيالىق ستراتەگيالار مەن ادىستەمەلىك ۇسىنىمدار ازىرلەۋ تۋرالى ۇسىنىستار جاسادى.