قاراعاندىدا ەلىمىزدىڭ بارلىق وڭىرىنەن كەلگەن باتىر پوليسەيلەر ماراپاتتالدى.
قاراعاندىعا ءتۇرلى جاعدايدا ازاماتتاردى قۇتقارىپ قالعان انتىنا ادال پوليسيا قىزمەتكەرلەرى مەن ۇلتتىق ۇلان وكىلدەرى جينالدى.
ىشكى ىستەر مينيسترلىگىنىڭ باستاماسىمەن ەلىمىزدىڭ ءار وڭىرىندە “قازىرگى زامان قاھارماندارى” رەسپۋبليكالىق اكسياسى وتەدى، دەپ حابارلايدى aqshamnews.kz سالا مينيسترلىگىنە سىلتەمە جاساپ.
ونىڭ ماقساتى – ەل ءۇشىن تۋعان ەرلەردىڭ ناعىز ءپاتريوتيزمىن ۇلگى ەتۋ. اكسيا “حالىق قاھارمانى” عازيز بايتاسوۆتىڭ ەرلىگىنە ارنالادى. پوليسيا قىزمەتكەرى لاڭكەستى ۇستاۋ كەزىندە قازا تاپقان.
اكسياعا قاتىسۋشىلار قايتىس بولعان پوليسيا قىزمەتكەرلەرىنە ارنالعان مەموريالعا گۇل شوقتارىن قويدى. ب.بەيسەنوۆا اتىنداعى ق ر ءىىم اكادەمياسىندا وتكەن دوڭگەلەك ۇستەلگە قاتىستى.
قازىرگى زامان قاھارماندارى – باتىلدىق ساباعىندا وقۋشىلارمەن كەزدەستى. ەلىمىزدە وسكەلەڭ ۇرپاقتى تاربيەلەۋ ءۇشىن جۇزدەن استام “جاس ساقشى” كادەت سىنىبى جۇمىس ىستەيدى. اتالعان كادەت سىنىپتارىنا قازا بولعان قىزمەتكەرلەردىڭ ەسىمى بەرىلگەن. اكسيا كەنشىلەر مادەنيەت سارايىندا وتكەن سالتاناتتى ىس-شارامەن اياقتالدى. وندا ەڭبەگى ەلەنگەن ءتارتىپ ساقشىسىنا ماراپاتتار تابىستالدى.
– بۇگىن ءبىز باتىلدىق، ار-نامىس جانە ادالدىقتارىمەن مەملەكەتتىڭ كۇشى مەن ادىلدىگىنە دەگەن سەنىمدى نىعايتاتىن ازاماتتارعا قۇرمەت كورسەتۋ ءۇشىن وسىندا جينالدىق. سىزدەر باتىرسىزدار، ناعىز قورعاۋشىسىزدار. كوشەلەردەگى قاۋىپسىزدىگى مەن تۇرعىنداردىڭ تىنىشتىعىن سىزدەر ورناتىپ جۇرسىزدەر. سىزدەر قازىرگى زامانعى پوليسيانىڭ قانداي بولۋى ءتيىس ەكەندىگىنىڭ جارقىن ۇلگىسىسىزدەر، – دەدى قاراعاندى وبلىسىنىڭ اكىمى ەرماعانبەت بولەكپايەۆ.
– اكسيانىڭ دىتتەگەن ماقساتى – پوليسەيلەردىڭ باتىرلىعىن ەسكە الىپ قانا قويماي، قوعامعا قىزمەت ەتۋدىڭ شىنايى قۇندىلىقتارىن ناسيحاتتاۋ. كۇن سايىن 10 مىڭنان استام پوليسيا قىزمەتكەرى قوعام قاۋىپسىزدىگى ءۇشىن ساپقا تۇرادى. ولار قىزمەت بابىندا حالىقتىڭ قاۋىپسىزدىگى جولىندا ءوز ومىرلەرىن ءقاۋىپ قاتەرگە تىگىپ قانا قويماي، كەي كەزدەرى جاندارىن بەرۋگە دە دايىن ەكەنىن اتاپ وتكەن ءجون، – دەدى ق ر ءىىم اقپاراتتىق ساياسات دەپارتامەنتىنىڭ باستىعى شىڭعىس الەكەشيەۆ.
ساحناعا 15 پوليسيا قىزمەتكەرى مەن ۇلتتىق ۇلان وكىلدەرى شىقتى. ولار ەرلىك كورسەتكەنى ءۇشىن مەملەكەتتىك جانە ۆەدومستۆولىق ناگرادالارمەن ماراپاتتالعان. دەنيس شەمەت ءوز ومىرىنە ءقاۋىپ توندىرە وتىرىپ، جاتتىعۋ كەزىندە مەرزىمدى قىزمەتتەگى ساربازدى گراناتا جارىلىسىنان امان الىپ قالعان. قازاقستان رەسپۋبليكاسى پرەزيدەنتىنىڭ جارلىعىمەن ول “ايبىن” وردەنىمەن ماراپاتتالدى.
پاترۋلدىك پوليسيا ينسپەكتورى بۇركىت الشىنبايەۆ ءوز ءومىرىن قاتەرگە تىگىپ، اۆتوبۋس پەن بالالاردى تاسىمالدايتىن جۇك كولىگىنىڭ سوقتىعىسۋىنىڭ الدىن الدى. ۋچاسكەلىك ينسپەكتور دامير قورعانبايەۆ ورتتەن ادامداردى قۇتقارىپ قالعان. كەزدەسۋگە سونداي-اق سۋعا باتىپ بارا جاتقان بالالارعا كومەك كورسەتۋ ءۇشىن سۋعا ءتۇسىپ، قۇتقارۋعا تالپىنعان ازاماتتار دا قاتىستى.
سالتاناتتى جيىندا قىزمەت بابىندا قازا تاپقان پوليسيا قىزمەتكەرلەرىنىڭ تۋىستارى دا بولدى. حالىق قاھارمانى عازيز بايتاسوۆتىڭ كىشى ۇلى ءادىلجان بايتاسوۆ تا بولدى. ولارعا دا ەستەلىك سىيلىقتار تابىس ەتىلدى. تاۋەلسىزدىك جىلدارىندا ەلىمىزدە قىزمەتتىك بورىشىن وتەۋ كەزىندە 819 ءتارتىپ ساقشىسى قازا تاپتى.
كەش مەرەكەلىك كونسەرتپەن اياقتالدى.