پوليسەيلەرگە سپۋتنيك كومەككە كەلدى

«جىل سايىن ماۋسىم-قازان ايلارى ارالىعىندا جابايى قاراسورانىڭ وسىپ-جەتىلۋى كەزەڭىندە ىشكى ىستەر مينيسترلىگى «قاراسورا» رەسپۋبليكالىق جەدەل-پروفيلاكتيكالىق ءىس-شاراسىن وتكىزەدى. 1 ماۋسىمنان بەرى اتالعان شارا بارىسىندا 820 ەسىرتكى قىلمىسى انىقتالدى. 6 ۇيىمداسقان قىلمىستىق توپتىڭ ارەكەتى توقتاتىلىپ، ولاردىڭ جەتەكشىلەرى مەن 54 قاتىسۋشىسى قىلمىستىق جاۋاپكەرشىلىككە تارتىلدى»، - دەدى ىشكى ىستەر مينيسترلىگىنىڭ وكىلى شۇعىلا تۇرلىبەك باسپا ءسوز ءماسليحاتىندا.

ءىىم مالىمەتىنشە، زاڭسىز اينالىمنان 32 توننا ەسىرتكى تاركىلەندى. ونىڭ ىشىندە 5،3 تونناعا جۋىق ماريحۋانا، 476 كەلىگە جۋىق گاشيش، 241 كەلىدەن استام «سينتەتيكا» جانە 62 كەلىدەن استام گەروين.

«قىزىلوردا، تۇركىستان جانە ۇلىتاۋ وبلىستارىندا قاراسورا وسىرىلگەن 65 پلانتاسيا انىقتالدى. ولاردىڭ جالپى اۋماعى 10 گەكتاردان استى. بۇل رەتتە سالماعى 20 توننادان اساتىن 70 مىڭنان استام قاراسورا بۇتالارى تاركىلەنىپ، جويىلدى. مۇنداي ەسىرتكى وسىمدىكتەرىن انىقتاۋ ءۇشىن پوليسەيلەر ۇلتتىق ۇلاننىڭ تىكۇشاقتارىن پايدالانىپ، «بۇركىت» ارنايى جاساعىنىڭ قىزمەتكەرلەرىن جۇمىلدىردى. قىزىلوردا، اقتوبە، تۇركىستان جانە ۇلىتاۋ وبلىستارىنىڭ اۋماعىندا 150 مىڭ شارشى شاقىرىمنان استام جەر تەكسەرىلدى. جالپى 70 رەت اۋەدەن بارلاۋ جۇرگىزىلدى»، - دەيدى ول.