قازاقستاندا مەديسينالىق ساقتاندىرۋى جوق ادامدارعا كولىك جۇرگىزۋگە جانە قارۋ ساقتاۋعا تىيىم سالۋ ۇسىنىلدى، دەپ حابارلايدى اlmaty-akshamy.kz حابارلايدى.
دەنساۋلىق ساقتاۋ ءمينيسترى اجار عينيات اتاپ وتكەندەي، قازىرگى ۋاقىتتا قارجى جۇيەسى اكتۋارلىق ەسەپ-قيساپتىڭ ءوسىپ كەلە جاتقان شىعىندارىن كوتەرە الماي وتىر. سوندىقتان الەۋمەتتىك مەديسينالىق ساقتاندىرۋ قورى الداعى ۋاقىتتا ءوز مىندەتتەمەلەرىن تولىق ورىنداي الماۋى مۇمكىن دەپ بولجايدى.
"جۇيەنىڭ ۇزاق مەرزىمدى قارجىلىق تۇراقتىلىعىن قامتاماسىز ەتۋ ءۇشىن كەلەسى قاجەتتى شارتتاردى ەسكەرۋ قاجەت: 2025 جىلدان باستاپ ءاربىر ازامات مىندەتتى سالىق دەكلاراسياسىن تاپسىرادى. وسىلايشا ساقتاندىرىلماعان ازاماتتاردىڭ تابىسى بەلگىلى بولىپ، شامامەن 700 مىڭداي ادام مىندەتتى مەديسينالىق ساقتاندىرۋ جۇيەسىنە تارتىلادى دەپ كۇتىلۋدە"، - دەدى اجار عينيات.
اۋىلداردا تۇراتىن از قامتىلعان 1،5 ميلليونعا جۋىق ادام بيۋدجەت قاراجاتىنان ساقتاندىرىلماق. 2026 جىلعا قاراي حالىقتى قامتۋ 95 پايىزدان كەم بولمايدى دەپ كۇتىلۋدە. سونداي-اق مەملەكەت پەن جۇمىس بەرۋشىلەردىڭ جارنا مولشەرلەمەلەرىن كەزەڭ-كەزەڭىمەن كوتەرۋ جوسپارلانۋدا. قازىرگى ۋاقىتتا جالاقىسى 700 مىڭ تەڭگەدەن اساتىن ازاماتتار ءۇشىن مىندەتتى مەديسينالىق ساقتاندىرۋ جۇيەسىنە اۋدارىمدار شەكتەلگەن. وسىعان بايلانىستى دەنساۋلىق ساقتاۋ مينيسترلىگى جۇمىس بەرۋشىنىڭ جارنالارىن ەسەپتەۋ ءۇشىن بازانىڭ جوعارعى شەگىن (10 ەڭ تومەنگى جالاقى) الىپ تاستاۋدى ۇسىنىپ وتىر.
"ساقتاندىرىلماعان ادامدارعا مەديسينالىق جانە ونىمەن بايلانىستى مەملەكەتتىك قىزمەتتەرگە شەكتەۋلەر ەنگىزۋ ۇسىنىلادى، مىسالى، كولىك جۇرگىزۋ، قارۋ ساقتاۋ جانە ت.ب"، - دەدى مينيستر.
ونىڭ ايتۋىنشا، ەگەر بۇل شارتتار ورىندالسا، قوردىڭ قارجىلىق تۇراقتىلىعى ساقتالادى.