قازاقستاندى ەندى ەشتەڭە توقتاتا المايدى
ەلىمىز بيىل ەشكىم كۇتپەگەن تەحنولوگيالىق سەرپىلىس جاسادى. جىلدىڭ اياعىندا قىزىلوردادا وتاندىق اينەك زاۋىتىنىڭ ساتىپ الۋشىلارعا دايىن ءونىمنىڭ العاشقى پارتياسىن جىبەرگەنىن جازعان بولاتىنبىز.
اراعا 3 كۇن سالىپ، اتىراۋدا "KPI" گازوحيميالىق زاۋىتى "پلاستماسسانىڭ كورولى" - پوليپروپيلەن ءوندىردى. العاشقى پارتيا زاۋىتپەن كونتراكتقا وتىرىپ قويعان وتاندىق كومپانيالارعا جونەلتىلدى. ءقازىر زاۋىت 10 كونتراكتقا قول قويىپ قويدى، ول بويىنشا بۇعان دەيىن پوليپروپيلەندى رەسەي مەن ءازىربايجاننان ساتىپ الىپ كەلگەن ءبىزدىڭ كومپانيالار ەندى وتاندىق پولۋفابريكاتتى الاتىن بولادى. ولار وتاندىق پوليمەردەن قاپشىقتار، بامپەرلەر، سەتكالار جاسايدى. العاشقى كەلىسىم بويىنشا 8 مىڭ توننا پوليپروپيلەن ساتىلدى.
KPI - ەۋرازياداعى ەڭ مىقتى زاۋىت. وزبەكستان، ءازىربايجان، تۇركىمەنستان زاۋىتتارى بىرىكسە دە، ءبىزدىڭ زاۋىتتىڭ كولەمىندەي ءونىم شىعارا المايدى. ونىڭ جىلدىق قۋاتى - 500 مىڭ توننا پوليپروپيلەن. وسىمەن ەسەپتەسەك، زاۋىتتىڭ جىلدىق ۆىرۋچكاسى كەم دەگەندە 105 ميلليارد تەڭگە بولاتىنىن بولجاۋعا بولادى. رەسەيدەگى ەڭ الىپ زاۋىت - سيبۋر حولدينگىنىڭ قۇرامىنا كىرەتىن "توبىل-پوليمەردىڭ" ءوزى جىلىنا تەك 436 مىڭ توننا پوليمەر وندىرەدى.
ەندى اتىراۋ - ماڭگىلىك كيەلى مەكەن. وندا مۇناي تاۋسىلسا، ول پلاستماسسا استاناسى بولىپ سانالىپ، ءوزىنىڭ ەكونوميكالىق ورلەۋىن جالعاستىرا بەرمەك.
KPI - پوليپروپيلەننىڭ ەڭ كوپ تارالعان، باعاسى ارزان 11 ءتۇرىن شىعارادى. بۇل جاڭالىقتان شابىت العان وتاندىق ينۆەستورلار تەز ارادا شىمكەنتتە وسى پوليمەردىڭ ەڭ قىمبات، پرەميۋم ءتۇرىن شىعاراتىن زاۋىت تۇرعىزاتىن بولدى. ياعني ءبىز پوليپروپيلەننىڭ ارزانىن دا، قىمباتىن دا جاسايتىن بولامىز.
قىزىلوردا اينەك، اتىراۋ مەن شىمكەنت پوليمەر وندىرسە، اقتاۋ ودان دا ءارى كەتتى. قازاقتىڭ بولاشاعى - لوگيستيكا، ترانزيت جاعىنان دا، ەنەرگيا جاعىنان دا اقتاۋعا تىكەلەي بايلانىستى بولادى.
اقتاۋ - بولاشاقتىڭ مۇنايى - "جاسىل" گيدروگەن (سۋتەگى/ۆودورود) وندىرمەك. شۆەد تەحنولوگتارى مەن ينۆەستورلارى وسى جوبانى دايىنداي باستادى. قازاقستان ۇكىمەتى تىكەلەي قولداۋ كورسەتىپ وتىر. جاسىل دەگەنىمىز - ەلەكتروليزبەن الىناتىن، ال وعان كەرەك ەنەرگيانى كۇن مەن جەل گەنەراسياسى بەرەتىن سۋتەگىنىڭ ەڭ ەكولوگيالىق تازا ءوندىرىسى. مۇنداي گيدروگەندى 2060 جىلى مۇناي مەن كومىردەن كەتەمىز دەپ وتىرعان باتىس الەمى الاقانىندا ۇستايتىنى انىق.
ستراتەگيالىق تۇرعىدان قاراساق، قازاقستان كەشەگىنىڭ وتىنى - كومىردى، بۇگىنگىنىڭ وتىنى - مۇناي مەن گازدى، ەرتەڭگىنىڭ وتىنى - ۋراندى ءقازىر ءوندىرىپ وتىرعان، جانە ونىمەن قويماي سۋپەربولاشاقتىڭ وتىنى - گيدروگەننىڭ قامىنا بۇگىننەن باستاپ كىرىسىپ جاتقان الەمدەگى ساناۋلى مەملەكەت.
سوندىقتان، وركەنيەت پەن تەحنيكالىق پروگرەسستەن ءبىز ەشقاشان تىس قالمايمىز. ءبىز وسى پروسەستەردىڭ ىشىندەمىز جانە الەمگە كەرەك مەملەكەتپىز.