«سول جاق كوزدىڭ گلاۋكوماسى، اسقىنعان كاتاراكتا» دەگەن دياگنوز قويىلعان 68 جاستاعى زەينەتكەر الماتىداعى ورتالىق قالالىق كلينيكالىق اۋرۋحانا ماماندارىنىڭ كومەگىنە جۇگىنگەن.
دارىگەرلەر ونىڭ كوزىنە كۇردەلى وتا جاساپ، كورۋ قابىلەتىن قالپىنا كەلتىردى، دەپ حابارلايدى Almaty-akshamy.kz اۋرۋحانانىڭ باسپا ءسوز قىزمەتىنە سىلتەمە جاساپ.
حابارلاماعا سۇيەنسەك، پاسيەنتتىڭ ەكىنشى كوزى مۇلدە كورمەي قالعان. ياعني، وڭ جاق كوز IV دەڭگەيلى گلاۋكوما، ياعني زاعيپتىق ستادياسىنا ءوتىپ كەتكەن. بولىمشە مەڭگەرۋشىسى گۇلزات ءابدىرايىموۆا باستاعان ماماندار اجەيدىڭ جاسى، جوعارعى قان قىسىمى سىندى قوسىمشا سىرقاتتارىنا قاراماستان كۇردەلى وتا جاساۋ تۋرالى شەشىم قابىلدادى.
اسقىنعان كاتاراكتاعا وتا جاسالىپ، كوزگە جاساندى قاراشىق ورناتىلدى. وپەراسيا جارتى ساعاتقا سوزىلدى. بۇل پاسيەنتتى كاتاراكتادان ارىلتىپ، كورۋ قابىلەتىن قالپىنا كەلتىرۋدىڭ جالعىز جولى بولاتىن، دەيدى دارىگەر.
«جوعارى قان قىسىمىن، ونىڭ ۇستىنە، اياق جولىن كورۋگە سەپ بولىپ وتىرعان جالعىز كوزگە وتا جاساۋ قاجەتتىگىن ەسكەرە وتىرىپ، الدىمەن ناۋقاستىڭ دەنساۋلىعىن رەتتەۋگە كۇش سالدىق، دايىندادىق. مۇنداي كۇردەلى وپەراسيا پاسيەنت ءۇشىن عانا ەمەس، حيرۋرگ ءۇشىن دە ءقاۋىپتى بولدى. پاسيەنتتىڭ باقىتىنا قاراي، وفتالمولوگتاردىڭ بىلىكتىلىگىنىڭ ارقاسىندا وتا ءساتتى ءوتتى. ءقازىر پاسيەنتتىڭ كوزى جاقسى كورەدى»، - دەيدى مامان.
«كەرەمەت! مەن ەندىگى سۋ قاراڭعى بولىپ قالعان شىعارمىن دەپ ويلايتىنمىن. بۇل كەرەمەتتى جاساعان گۇلزات تالعاتقىزىنا العىسىم شەكسىز! وتا جاساپ، ماعان جارىق دۇنيەنى كورۋ باقىتىن سىيلادى. دارىگەرلەردىڭ دەنىنە ساۋلىق، باقىت تىلەيمىن. الداعى ۋاقىتتا دا جۇمىستا تابىستى بولىڭىزدار، اق حالاتتى ابزال جان دەگەن قۇرمەتكە لايىق بولىڭىزدار! وسىنشا ادامعا كوز جانارىن «قايتارىپ»، كورۋگە مۇمكىندىك سىيلاپ جاتقان قولدارىڭىز دەرت كورمەسىن»، - دەدى اپا.
ەستەرىڭىزگە سالا كەتسەك، ورتالىق قالالىق كلينيكالىق اۋرۋحانا الماتىنىڭ عانا ەمەس، رەسپۋبليكا وڭىرلەرىنىڭ حالقىنا جوسپارلى وفتالمولوگيالىق كومەك كورسەتەتىن وڭتۇستىك استاناداعى جالعىز قالالىق اۋرۋحانا. وسى جىلدىڭ 9 ايىندا مىندەتتى الەۋمەتتىك مەديسينالىق ساقتاندىرۋ پاكەتى شەڭبەرىندە 600-گە جۋىق وتا جاسالدى. ولاردىڭ باسىم بولىگى وسىنداي جوعارى تەحنولوگيالىق كۇردەلى وتالار.