قازىرگى پوليگرافيا سالاسى تەرەڭ ترانسفورماسيا كەزەڭىن باستان وتكەرىپ جاتىر. وندىرىستىك ۇدەرىستەردىڭ سيفرلانۋى، جاڭا مەديافورماتتاردىڭ دامۋى، تۇتىنۋشىلىق مىنەز-قۇلىقتىڭ وزگەرۋى — مۇنىڭ ءبارى مامانداردان جاڭا ءبىلىمدى، يكەمدىلىكتى جانە ۇزدىكسىز وقۋعا دايىن بولۋدى تالاپ ەتەدى. وسىنداي جاعدايدا ءبىلىم بەرۋ ۇيىمدارى مەن جۇمىس بەرۋشىلەر اراسىنداعى ءوزارا ارەكەتتەستىك سالانىڭ تۇراقتى دامۋىن قامتاماسىز ەتۋدىڭ شەشۋشى فاكتورى بولىپ تابىلادى.
2025 جىلى 15 ساۋىردە الماتى قالاسىنداعى جۇمىسشى ماماندىقتار جىلى اياسىندا «پرينتمەديا تەحنولوگيالار كوللەدجى» كمقك جۇمىس بەرۋشىلەرمەن بىرلەسە وتىرىپ، كادرلاردى دايارلاۋ ماسەلەلەرى بويىنشا «پوليگرافيا جانە ءبىلىم بەرۋ: جاڭا مۇمكىندىكتەر» اتتى فورسايت-سەسسيانى ءوز بازاسىندا وتكىزدى.
فورسايت-سەسسيانىڭ ماقساتى – «پوليگرافيالىق جانە قاپتاما ءوندىرىسى» باعىتى بويىنشا كاسىبي-تەحنيكالىق ءبىلىم بەرۋدى دامىتۋدىڭ قىسقا، ورتا جانە ۇزاق مەرزىمدى كەزەڭدەرگە ارنالعان ورتاق كوزقاراسىن قالىپتاستىرۋ جانە پوليگرافيا سالاسىنا يننوۆاسيالاردى ەنگىزۋ ءۇشىن ناقتى قادامداردى ايقىنداۋ.
فورسايت-سەسسيا جۇمىس بەرۋشىلەر مەن ءبىلىم بەرۋ ۇيىمدارى اراسىندا ديالوگ الاڭىن قۇرۋعا باعىتتالعان. بۇل پوليگرافيا سالاسىنا قازىرگى زامان تالاپتارى مەن سىن-تەگەۋرىندەرىن ەسكەرە وتىرىپ، بىلىكتى كادرلاردى ءتيىمدى دايارلاۋعا مۇمكىندىك بەرەدى.
ونداعان جىلدار بويى پوليگرافيا سالاسىنداعى كادرلاردى دايارلاۋ جۇيەسى نەگىزىنەن كونسەرۆاتيۆتى سيپاتتا بولىپ، قالىپتاسقان كاسىبي ستاندارتتارعا سۇيەنىپ كەلدى. الايدا XXI عاسىردا ءبىلىم بەرۋ باعدارلامالارى مەن بيزنەستىڭ ناقتى قاجەتتىلىكتەرى اراسىنداعى تۇراقتى بايلانىس وزەكتىلىگىن جوعالتا باستادى. قازىرگى ەكونوميكانىڭ سىن-تەگەۋرىندەرى جاڭا تالاپتاردى العا تارتادى:
- سيفرلىق داعدىلار مەن كروسس-فۋنكسيونالدىق قۇزىرەتتەردى بىرىكتىرۋ؛
- جوبالىق جانە يكەمدى جۇمىسپەن قامتۋدىڭ (فريلانس، ءوزىن-وزى جۇمىسپەن قامتۋ) ۇلەسىنىڭ ارتۋى؛
- جاڭا ماماندىقتاردىڭ پايدا بولۋى جانە ءداستۇرلى رولدەردىڭ ترانسفورماسياسى؛
- soft skills – كرەاتيۆتىلىك، سىني ويلاۋ، كوممۋنيكابەلدىك سياقتى جەكە قابىلەتتەردى قالىپتاستىرۋ قاجەتتىلىگى.
قازىرگى پوليگرافيا تەك كىتاپتار مەن گازەتتەردى باسىپ شىعارۋ عانا ەمەس. بۇل — مۋلتيمەديالىق كوممۋنيكاسيالار، وراما ديزاينى، سيفرلىق باسپالار، باسپا مەن ماركەتينگتە AR/VR تەحنولوگيالارىنىڭ قولدانىلۋى. كوپتەپ ماماندار جاڭا كاسىبي شەكارالاردا جۇمىس ىستەۋدە: ديزاينەر-پوليگرافيست، سيفرلىق باسپا وپەراتورى، پرەپرەسس دايىنداۋ داعدىلارى بار مامان، پوليگرافيالىق جوبالار مەنەدجەرى جانە تاعى باسقالار.
پرەفورسايت، ياعني زەرتتەۋ تاقىرىبىنىڭ الدىن الا انىقتالۋى، 2025 جىلى 1 ناۋرىز بەن 8 ءساۋىر ارالىعىندا جۇرگىزىلدى. پرەفورسايت — شاعىن ساراپشىلار توبىنىڭ قاتىسۋىمەن وتەتىن دايىندىق كەزەڭى. بۇل كەزەڭدە زەرتتەۋ سالاسى، ماقساتتى اۋديتوريا جانە تارتىلاتىن ماماندار توبى ايقىندالادى. قاتىسۋشىلار: كوللەدج ديرەكتورلارى مەن ورىنباسارلارى، جوعارى وقۋ ورىندارىنىڭ وكىلدەرى، ساراپشىلار، جۇمىس بەرۋشىلەردىڭ وكىلدەرى، ستۋدەنتتەر.
سونىمەن قاتار، ءدال وسى ۋاقىتتا 2ء-شى تاكت: «ترەندتەردى انىقتاۋ» جۇرگىزىلدى. ترەندتەردى تالداۋ مەن ەكستراپولياسيا — قازىرگى زامانعى تەندەنسيالاردى زەرتتەۋ جانە ولاردىڭ بولاشاقتا قالاي داميتىنىن بولجاۋ پروسەسى. بۇل پروسەسس قازىرگى تاجىريبەلەردىڭ بولاشاقتاعى ىقپالىن تۇسىنۋگە مۇمكىندىك بەرەدى.
پرەفورسايت ناتيجەسىندە بولاشاقتىڭ ايماقتىق كارتاسى جاسالدى، وندا تومەندەگى ءوزارا بايلانىستى تەحنولوگيالىق جانە الەۋمەتتىك ترەندتەر ايقىندالدى:
- وندىرىستىك پروسەستەردى سيفرلاندىرۋ، اۆتوماتتاندىرۋ جانە روبوتتاندىرۋ؛
- ءتۇرلى ءوزىن-وزى جۇمىسپەن قامتۋ تۇرلەرىنىڭ (فريلانس، event-يندۋسترياداعى جۇمىس) كەڭەيۋى، ولاردىڭ ديناميكاسى قاتىسۋشىلاردىڭ پىكىرىنشە، جاڭا ءبىلىم بەرۋ فورمالارىنىڭ دامۋى مەن جاڭا ومىرلىك بەينەلەر مەن يدەالداردىڭ قالىپتاسۋىنا بايلانىستى وزگەرەتىن بولادى؛
- تەحنولوگيالىق ريەۆوليۋسيالار ناتيجەسىندە بەلگىلى ماماندىقتاردىڭ جىلدام وزگەرۋى؛
- كەڭ اۋقىمدى مامانداردىڭ (پوليپروفەسسيونالداردىڭ) پايدا بولۋى؛
- كارەرالىق قۇندىلىقتاردىڭ وتباسىلىق قۇندىلىقتاردان باسىم بولۋى الەۋمەتتىك ترەند رەتىندە قاراستىرىلادى، الايدا بۇل ءۇردىس كەيىننەن وتباسىلىق قۇندىلىقتاردىڭ نىعايۋىنا الىپ كەلەدى دەپ كۇتىلۋدە؛
- ادامنىڭ جانە روبوتتاردىڭ اراسىنداعى باسەكەلەستىك، روبوتتار ادام ەڭبەگىن الماستىرا الاتىن سالالاردا جانە ونىڭ ناتيجەسىندە شىعارماشىلىق ماماندىقتاردىڭ مارتەبەسىنىڭ ارتۋى؛
- كاسىبي جانە تاقىرىپتىق قىزىعۋشىلىقتار بويىنشا توپتاسقان ادامداردىڭ كوبەيۋى؛
- VR تەحنولوگيالارىنىڭ ءبىلىم بەرۋ مەن پوليگرافيا سالاسىنا ەنگىزىلۋى.
قاتىسۋشىلار ءبىر توقتامعا كەلىپ، كەيبىر ترەندتەر تەك ۇزاق مەرزىمدى بولاشاقتا بايقالاتىنىن ايتتى: ادامنىڭ شىعارماشىلىق ويلاۋىن الماستىرا الاتىن قۋاتتى جاساندى ينتەللەكتىنىڭ پايدا بولۋى جانە كريپتوۆاليۋتالاردى تولەم قۇرالى رەتىندە قابىلداۋ.
ساۋالناما ناتيجەلەرى مەن يندۋستريا وكىلدەرىمەن جۇرگىزىلگەن تاجىريبەلىك جۇمىستىڭ كورسەتكەنىندەي، نەگىزگى تالاپتار مىنالار بولىپ تابىلادى: ءوز بەتىنشە جۇمىس ىستەي ءبىلۋ جانە شەشىم قابىلداي الۋ؛ گرافيكالىق باعدارلامالاردى، سيفرلىق پلاتفورمالاردى جانە مەديا سالاسىنداعى جاڭا ترەندتەردى ءبىلۋ؛ كوماندادا جۇمىس ىستەي الۋ جانە كليەنتپەن ءتيىمدى كوممۋنيكاسيا جاساي ءبىلۋ؛ تاجىريبەلىك داعدىلار — ءتىپتى وقۋ ىس-تاجىريبەلەرى تۇرىندە.
قازىرگى زامانعى تالاپتارعا ساي كادرلاردى دايارلاۋ ءۇشىن «جوعارى وقۋ ورنى — تۇلەك — ەڭبەك نارىعى» ءداستۇرلى جۇيەسىنەن «جوعارى وقۋ ورنى — ستۋدەنت — جۇمىس بەرۋشى» اراسىندا ءوزارا ارەكەتتەستىك ءۇشبۇرىشىنا كوشۋ قاجەت.
«پوليگرافيا جانە ءبىلىم بەرۋ: جاڭا مۇمكىندىكتەر» فورسايت-سەسسياسى اياسىندا جۇمىس بەرۋشىلەرمەن بىرلەسىپ كادر دايارلاۋ ماسەلەلەرى بويىنشا دايىندالعان سۇراقتار قاتىسۋشىلارعا سالانىڭ قىسقا جانە ۇزاق مەرزىمدى ترەندتەرى، پروبلەمالارى مەن مۇمكىندىكتەرى تۋرالى تۇسىنىك بەرىپ، كادرلىق الەۋەتتى دامىتۋ باعىتتارىن انىقتاۋعا كومەكتەسەدى.
نەگىزگى دامۋ باعىتتارى:
ء-بىلىم بەرۋ باعدارلامالارىن بىرلەسىپ ازىرلەۋ: جۇمىس بەرۋشىلەردىڭ كۋرستاردى، وقۋ جوسپارلارىن جانە بىلىكتىلىك باعالاۋ كريتەرييلەرىن جوبالاۋعا قاتىسۋى.
- دۋالدى جانە جوبالىق وقىتۋ فورماتتارى: تاعىلىمدامالار، ناقتى بيزنەس تاپسىرمالارى بويىنشا زەرتحانالار، كەيس-چەمپيوناتتار، بىرلەسكەن ماستەر-كلاسستار.
- فورسايت-سەسسيالار جانە كاسىبي باعدار بەرۋ ءىس-شارالارى: تەندەنسيالاردى ۇنەمى بولجاۋ جانە ستۋدەنتتەردى يكەمدى كارەرالىق جولدارعا دايىنداۋ.
- جەلىلىك كاسىبي قاۋىمداستىقتار قۇرۋ: ۋنيۆەرسيتەتتەر، كوللەدجدەر مەن كومپانيالاردى تاجىريبە الماسۋ جانە تابىستى جوبالاردى تاراتۋ ءۇشىن بىرىكتىرۋ.
قازىرگى پوليگرافيا سالاسىنداعى ءبىلىم بەرۋ جۇيەسى اناعۇرلىم بەيىمدەلگەن، يكەمدى ءارى يندۋستريامەن سەرىكتەستىكتى كوزدەيتىن بولۋى ءتيىس. تەك ءبىلىم بەرۋ مەكەمەلەرى مەن جۇمىس بەرۋشىلەر اراسىندا تۇراقتى ديالوگ جاعدايىندا عانا سيفرلىق جانە شىعارماشىلىق ەكونوميكا سىن-تەگەۋرىندەرىنە دايىن، تۇراقتى كادرلىق رەزەرۆ قالىپتاستىرۋ مۇمكىن بولادى.
ۋنيۆەرسيتەتتەردىڭ ءرولىن قايتا قاراۋ قاجەت — ولار تەك ءبىلىم بەرۋ ورىندارى عانا ەمەس، سونىمەن بىرگە داعدىلاردى قالىپتاستىراتىن، باستاماشىلىقتى دامىتاتىن جانە ستۋدەنتتەردىڭ ناقتى تاجىريبەسىن جيناقتايتىن الاڭعا اينالۋى ءتيىس. ال جۇمىس بەرۋشىلەر تەك ەڭبەك رەسۋرستارىن تۇتىنۋشى ەمەس، بولاشاق كادرلاردى دايارلاۋعا بەلسەنە قاتىساتىن نەگىزگى تاراپ بولۋى كەرەك.