پويىزعا بيلەت نەگە جوق؟ – كومپانيا وكىلىنىڭ جاۋابى

ەسكى ءتيپتى ۆاگوندارعا شاعىم كوپ

بۇل تۋرالى «جەلمايا» جوباسىنا سۇحبات بەرگەن «جولاۋشىلار تاسىمالى» اق رەسمي وكىلى ءمادي مۇحامەدقالي مالىمدەدى، دەپ حابارلايدى Almaty-akshamy.kz BAQ.KZ-كە سىلتەمە جاساپ.
ايتۋىنشا، جولاۋشىلار كەيدە ۆاگونداردىڭ ەسكىلىگىنە شاعىم ايتىپ جاتادى. 

«جولاۋشىلار تاراپىنان ەسكى ءتيپتى ۆاگوندارعا قاتىستى شاعىمدار تۇسەتىنى جاسىرىن ەمەس. ءبىراق بىزدەن بولەك جەكەمەنشىك تاسىمالداۋشى 10 شاقتى كومپانيا بار. ولار يندۋستريا جانە ينفراقۇرىلىمدىق دامۋ مينيسترلىگىنە تىكەلەي قارايدى. باقىلاۋ فۋنكسياسى دا تىكەلەي سول ۆەدومستۆونىڭ قۇزىرەتىندە»، - دەپ اتاپ ءوتتى كومپانيانىڭ رەسمي وكىلى. 

سونداي-اق ول جازدا قاي باعىتقا ادامدار كوپ قاتىنايتىنىنا توقتالدى.

«ءبىزدىڭ قاراماعىمىزدا 2200-دەن استام ۆاگون بار. جازعى ماۋسىمدا 158 باعىت بويىنشا پويىزدار قاتىنايدى. ماسەلەن، ەڭ تانىمالى – الاكول باعىتى. بيىل اتالعان باعىتقا تالگو پويىزدارىن قوستىق. ودان بولەك، تالگو پويىزدارىنىڭ ۇشەۋى – نۇر-سۇلتان قالاسىنان، بەسەۋى – الماتى قالاسىنان، بىرەۋى – وسكەمەننەن، بىرەۋى» – اباي وبلىسىنان جانە اقتوعايدان دوستىققا قاتىنايتىن بارلىق پويىز بار، - دەدى ءمادي مۇحامەدقالي.

قازىرگى ۋاقىتتا پويىزعا بيلەتتىڭ جەتپەي جاتقاندىعىن بىلاي ءتۇسىندىردى. 

«پاندەميادان سوڭ حالىق دەمالىسقا شىعىپ، قىدىرعىسى كەلەدى. ودان بولەك، حالىقارالىق پويىزدار قوسىلدى. مىسالى، اتىراۋدان استراحانعا، الماتىدان تاشكەنتكە، بەينەۋدەن نۇكىسكە قاتىنايتىن پويىزدار بار. سونداي-اق ءقازىر ترانزيتتىك پويىزدار شىقتى»، - دەيدى ول.