ماسەلە باقىلاۋدا
جەلىدە جاڭادان توسەلگەن اسفالتتىڭ استىندا قالىپ كەتكەن دوڭگەلەكتىڭ فوتوسى پايدا بولدى. بۇل سۋرەت اقبۇلاق ىقشام اۋدانىنداعى جول جوندەۋ جۇمىستارىنان كەيىن تۇسىرىلگەن، دەپ حابارلايدى Almaty-akshamy.kz قازاقپارات-قا سىلتەمە جاساپ. الماتى قالاسى اكىمدىگى باسپا ءسوز قىزمەتىنىڭ مالىمەتىنشە، ىقشام اۋدانداعى كوشەنىڭ بىرىنە اسفالت توسەۋ كەزىندە تۇرعىندار ول جەردە مەتالل ليۋگى بارىن حابارلايدى. الايدا، 0.6 مەتر تەرەڭدىكتەگى قۇدىق جول نەگىزىن دايىنداۋ كەزىندە بايقالماعان.
«تۇرعىندار ليۋك ورنالاسقان جەر بەلگىلى بولۋ ءۇشىن ۇستىنە دوڭگەلەك قويعان. كەلەسى كۇنى ول جەر قازىلدى. كەيىن بەتونداۋ مەن اسفالتتاۋ ارقىلى قاجەتتى دەڭگەيگە كوتەرىلدى. قازىرگى ۋاقىتتا تەحنيكالىق قاداعالاۋ ماماندارى مەن تۇرعىندار بىرلەسىپ، باسقا دا ليۋكتەردى انىقتاۋ ماقساتىندا ىقشام اۋدانداعى كوشەلەردى قاراپ شىعۋعا كىرىستى. ماسەلە باقىلاۋدا»، - دەپ حابارلادى اكىمدىكتەن.