ەل ءىشى – ونەر كەنىشى.
قاراعاندى وبلىسىنىڭ بالقاش قالاسىندا ەرەكشە ونەر يەسى تۇرادى. 65 جاستاعى يۋريي ۆوروبيەۆ ءۇيىنىڭ كىرەبەرىسىن پلاستيكالىق قاقپاقتارمەن بەزەندىرىپ قويعان، دەپ حابارلايدى Almaty-akshamy.kz Qazaqstan.tv-عا سىلتەمە جاساپ.
ەكى قاباتتى تۇرعىن ءۇيدىڭ كىرەبەرىسى قۇددى ەرتەگى الەمىندەي. مۇنداعى قابىرعالار مەن ەدەندە ءتۇرلى ەرتەگى كەيىپكەرلەرىن، اڭ مەن قۇستاردىڭ بەينەسىن كورۋگە بولادى. مۇنىڭ بارلىعى دا ءتۇرلى-تۇستى قاقپاقتارمەن جاسالعان. تۇرعىندار جىلدا ءدالىزدى سىلاپ اۋرە بولمايدى. شاڭىن ءسۇرتىپ، جۋىپ السا بولعانى.
«يۋرا اعاي بار، ءوزىمىز وسى كورشىلەر ءتاتۋ-تاتتى ءومىر سۇرەمىز، قاقپاقتاردىڭ ءوزىن بىرگە جينايمىز. ونى لاقتىرۋ دەگەندى بىلمەيمىز، اكەلىپ بەرەمىز. بارلىعىن ىستەۋدى بىلەدى عوي ول كىسى. ۇيگە قوناققا كەلگەندەر پودەزدى كورىپ، قىزىعىپ، سۋرەتكە تۇسەدى، الەۋمەتتىك جەلىگە سالادى»، – دەيدى بالقاش قالاسىنىڭ تۇرعىنى الىبەك تاسبولاتوۆ.
يۋريي ۆوروبيەۆتىڭ بۇل ۇيدە تۇرعانىنا 20 جىلدان اسىپ كەتكەن. كىرەبەرىستى بەزەندىرۋ ءۇشىن 60 مىڭ قاقپاق كەتكەن. وعان زەينەتكەر ءتورت جىل ۋاقىتىن ارناپتى.
«زەينەتكە شىققاننان كەزىم پاندەمياعا ءتسۇپا-تۇس كەلدى. كارانتيندە ءىشىم پىسقان سوڭ ول پلاستيكالىق بوتەلكەلەردىڭ قاقپاقتارىن جيناپ، ولاردان سۋرەتتەر، كومپوزيسيالار جاساي باستادىم. بۇرىن جەرگىلىكتى كومبيناتتا دانەكەرلەۋشى بولىپ جۇمىس ىستەدىم. مەن ەلەكتر جۇيەسىن، سانتەحنيكانى دا ءوزىم جوندەي بەرەمىن. جاس كەزىمدە اعاش ويۋمەن اينالىسقانمىن»، – دەيدى بالقاش قالاسىنىڭ تۇرعىنى يۋريي ۆوروبيەۆ.
بالقاشتىق شەبەر جۇبايىمەن ەكەۋى سەرۋەنگە شىققاندا قاقپاق جيناۋدى ادەتكە اينالدىرعان. وعان كورشىلەرى مەن دوستارى دا كومەكتەسەدى. زەينەتكەر ءوزىنىڭ ەرمەگىن قالا تازالىعىن ساقتاۋعا تيتىمدەي بولسا دا ۇلەسىم دەپ سانايدى. بۇگىندە يۋريي ۆوروبيەۆ تۇراتىن ءۇيدى جۇرت جاقسى بىلەدى. ءتىپتى، ونىڭ ەرەكشە قول تۋىندىسىن كورۋگە ارنايى كەلىپ، سۋرەتكە تۇسىرەتىندەر دە كوپ.
