21 قازاندا الماتىدا Eco Network ەكوحابى اۋماعىندا قالانىڭ وڭىرلىك كوممۋنيكاسيالار قىزمەتى ۇيىمداستىرعان باسپا ءسوز تۋرى ءوتتى. ءىس – شارا بارىسىندا قاتىسۋشىلارعا ەكولوگيالىق باستامالار ۇسىنىلىپ، «تازا قازاقستان» جالپى رەسپۋبليكالىق باعدارلاماسى جانە «ءالماتى-بىزدىڭ ورتاق ءۇيىمىز» قالالىق ناۋقانى اياسىندا وتكىزىلەتىن Plastic Reboot اكسياسى تۋرالى ەگجەي-تەگجەيلى ايتىلدى، دەپ حابارلايدى aqshamnews.kz.
الماتىداعى ەكوحاب تۇرعىندار قالدىقتاردى تاپسىرىپ قانا قويماي، ولاردىڭ پايدالى زاتتارعا قالاي اينالاتىنىن كورە الاتىن ورىنعا اينالدى. مۇندا قايتا وڭدەلگەن پلاستيكتەن شامدار، ساعاتتار مەن ستەندتەر جاسالىپ، قالدىقتاردى بولەك جيناۋ مادەنيەتى داميدى. حاب ەكولوگياعا سانالى كوزقاراستى بەلسەندى قالىپتاستىرادى جانە لاستانۋ دەڭگەيىن تومەندەتۋگە ىقپال ەتەدى.
قاتىسۋشىلاردىڭ نازارىن Plastic Reboot اكسياسى اۋداردى. ءىس — شارا اياسىندا جۋرناليستەرگە ۆەلوشرەدەر-پەدالمەن پلاستيكتى ۇساقتاۋعا مۇمكىندىك بەرەتىن قۇرىلعى كورسەتىلدى. سونداي-اق، حاب اۋماعىندا پلاستيكالىق بوتەلكەلەر مەن اليۋمينيي بانكالاردى اقشاعا ايىرباستاۋعا ارنالعان فاندومات ورناتىلعان.
اكسيا 18-24 قازان ارالىعىندا ەكوحاب، وقۋشىلار سارايى جانە قالانىڭ جاستارعا ارنالعان كوميۋنيتي ورتالىقتارى بازاسىندا وتەدى. تۇرعىندار پلاستيكالىق بوتەلكەلەر مەن قاپتامالاردى ارنايى پۋنكتتەرگە تاپسىرىپ، ءاربىر بىرلىك ءۇشىن 5 تەڭگە الا الادى، بۇل قايتا وڭدەۋدى ىنتالاندىرادى جانە پلاستيك قالدىقتارىنىڭ مولشەرىن ازايتادى.
Eco Network جوباسىنىڭ جەتەكشىسى ەۆگەنيي مۇحامەدجانوۆ Plastic Reboot ادامداردى جاۋاپتى تۇتىنۋعا جانە قايتا وڭدەۋگە قالاي ىنتالاندىرۋعا بولاتىنىنىڭ مىسالى ەكەنىن اتاپ ءوتتى.
«پلاستماسسادان باسقا، ەكوحابتار قالدىقتاردى تۋريستەر مەن قالا تۇرعىندارى اراسىندا تانىمال ۇلتتىق سيمۆوليكاسى بار كادەسىيلارعا قايتا وڭدەۋدى ۇسىنادى. بۇل كىشىگىرىم قادامدار ادامداردى قىزىقتىرادى جانە قايتا وڭدەۋدىڭ پايدالى جانە قىزىقتى بولۋى مۇمكىن ەكەنىن كورسەتەدى»، – دەپ اتاپ ءوتتى ول.
اكسيانىڭ ماڭىزدىلىعى مەن تۇرعىنداردىڭ قاتىسۋى تۋرالى الماتى قالاسى ەكولوگيا جانە قورشاعان ورتا باسقارماسىنىڭ وكىلى ءبىرجان سىدىقبەكوۆ ايتىپ بەردى.
«بۇل اكسيا قالا تۇرعىندارىن پلاستيكتى قايتا وڭدەۋگە تاپسىرۋعا ىنتالاندىرىپ قانا قويمايدى، سونىمەن قاتار حالىقتىڭ تۇتىنۋعا سانالى كوزقاراسىن قالىپتاستىرۋعا، لاستانۋ دەڭگەيىن تومەندەتۋگە جانە قالاداعى ەكولوگيالىق جاعدايدى جاقسارتۋعا كومەكتەسەدى»، - دەدى ول.
اكسيا اياسىندا قايتا وڭدەلەتىن پلاستيك قابىلدانادى: سۋسىنداردان بوتەلكەلەر، سۋسابىنداردىڭ، گەلدەردىڭ جانە تۇرمىستىق حيميكاتتاردىڭ قاپتامالارى، سونداي-اق، 5 تاڭبالى ءبىر رەتتىك ىدىس-اياقتار جانە كەيبىر وندىرۋشىلەردىڭ قاپتامالارى (اميران، گورمولزاۆود).
ناۋقان جانە پلاستيكتىڭ قابىلداناتىن تۇرلەرى تۋرالى تولىعىراق مىنا تەلەفوندار ارقىلى بىلۋگە بولادى: +7 747 779 8010 (حامزا)، +7 707 358 9992 (نازگۇل).
بۇعان دەيىن، پلاستيكالىق بوتەلكە وتكىزىپ، اقشا تابۋ تۋرالى كەڭىرەك جازعان ەدىك.