پرەزيدەنتتىڭ تاپسىرماسى بويىنشا مەملەكەتكە قايتارىلعان قاراجات ەسەبىنەن تۇركىستان جانە اقمولا وبلىستارىندا الەۋمەتتىك نىساندار سالىنادى، دەپ حابارلايدى aqshamnews.kz
زاڭسىز اكتيۆتەردى قايتارۋ جونىندەگى كوميسسيا «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭ شەڭبەرىندە جۇمىسىن جالعاستىرۋدا. بارلىق قاراجات الەۋمەتتىك پايدالى ماقساتتارعا ودان ءارى قايتا ءبولۋ ءۇشىن ارناۋلى مەملەكەتتىك قورعا جىبەرىلەدى.
ۇكىمەت مەملەكەت باسشىسىنىڭ تاپسىرماسى بويىنشا اقمولا وبلىسىنىڭ زەرەندى اۋىلىندا قۇنى 2،1 ملرد تەڭگە بولاتىن سپورت كەشەنىن جانە تۇركىستان وبلىسىنىڭ تەمىرلان اۋىلىندا 890 ملن تەڭگە سوماعا مۋزىكا مەكتەبىن سالۋ جونىندەگى العاشقى ەكى الەۋمەتتىك جوبانى ىسكە اسىرۋعا ارناۋلى مەملەكەتتىك قوردان قاراجات ءبولۋ تۋرالى شەشىم قابىلدادى.
بۇل باستامالار اۋىلدىق جەرلەردە ءبىلىم بەرۋ جانە سپورتتىق قىزمەتتەرمەن قامتۋدى ارتتىرۋ ماقساتىندا الەۋمەتتىك ينفراقۇرىلىمدى دامىتۋعا باعىتتالعان.
ماسەلەن، اقمولا وبلىسىنىڭ زەرەندى اۋىلىندا اۋدانى 6 مىڭ م² اساتىن، ءبىر اۋىسىمدا 80 ادامدى قابىلداي الاتىن سپورت كەشەنىن سالۋ جوسپارلانىپ وتىر. نىسان بەلسەندى تۇرعىندارعا بوس ۋاقىتىن ءتيىمدى وتكىزۋگە مۇمكىندىك بەرەدى – اۋداندا 14،5 مىڭنان استام ادام جۇيەلى تۇردە سپورتپەن شۇعىلدانادى.
جوباعا سايكەس، ورتالىقتا كۇرەس، بوكس، شاڭعى تەبۋ سياقتى سپورت تۇرلەرىمەن اينالىسۋعا ارنالعان جابدىقتار ورناتىلادى، 2 جاتتىعۋ زالى قاجەتتى قۇرال-جابدىقتارمەن جابدىقتالادى. سونداي-اق كەشەندە سپورتشىلاردى جاتتىقتىرۋ مەن ساۋىقتىرۋ جۇمىستارىن ساپالى ءارى ءتيىمدى جۇزەگە اسىرۋ ءۇشىن قاجەتتى قۇرال-جابدىقتار مەن قوسالقى ءۇي-جايلار قاراستىرىلعان.
تۇركىستان وبلىسىنداعى تەمىرلان اۋىلىندا 300 ورىندىق جاڭا ونەر مەكتەبىن سالۋ جوسپارلانىپ وتىر. 1974 جىلى سالىنعان قازىرگى عيمارات زاماناۋي سانيتارلىق جانە ءورت قاۋىپسىزدىگى تالاپتارىنا ساي ەمەس ءارى كۇردەلى جوندەۋگە جارامسىز. سوعان قاراماستان بۇگىنگى تاڭدا كەشەن جۇمىس ىستەپ تۇر – ورتالىقتا 420-عا دەيىن بالا وقيدى، بۇل ونىڭ قازىرگى قابىلداۋ مۇمكىندىگىنەن 2 ەسەگە ارتىق، 45 ءمۇعالىم ساباق بەرەدى. جاڭا جوبا اۋىلدا ونەر سالاسىندا قوسىمشا ساپالى ءبىلىم الۋعا جاعداي جاسايدى. بالالار جايلى ورتادا مۋزىكامەن جانە حورەوگرافيامەن اينالىسۋعا مۇمكىندىك الادى.
بۇگىنگى تاڭدا ارناۋلى مەملەكەتتىك قوردا 177 ملرد تەڭگە جيناقتالعان. بۇل قاراجاتتىڭ بارلىعى الەۋمەتتىك جانە ينفراقۇرىلىمدىق نىساندار سالۋعا، سونداي-اق دەنساۋلىق ساقتاۋ، ءبىلىم بەرۋ، بۇقارالىق سپورت جانە وزگە دە الەۋمەتتىك ماڭىزدى جوبالاردى ىسكە اسىرۋعا باعىتتالادى.
زاڭسىز يەمدەنىلگەن اكتيۆتەردى مەملەكەتكە قايتارۋ ماسەلەلەرى جونىندەگى كوميسسيانى ق ر پرەمەر-مينيسترى باسقارادى، ال جۇمىس ورگانى – ق ر باس پروكۋراتۋراسىنىڭ اكتيۆتەردى قايتارۋ جونىندەگى كوميتەتى.