پىسكەن قاربىزدى قالاي «تانيمىز»؟

شىلىڭگىر شىلدەدە ءشولباسار قاربىزدىڭ ناۋقانى قىزا تۇسەدى.

ءبىراق، ساتىپ العان قاربىزدىڭ ءبارى بىردەي ءتىل ۇيىرە بەرمەيدى، كەيبىرىنىڭ ءتۇسى سولعىن، سوندىقتان ءدامدىسىن تاڭداي ءبىلۋ كەرەك. Almaty-akshamy.kz قاربىز تاڭداۋ جايلى پايدالى كەڭەستەرمەن بولىسەدى.

ەڭ الدىمەن قاربىزدىڭ «كىندىگىنە» قاراڭىز. ەگەر كىندىگى ءبىر نۇكتە عانا بولسا، ول – اتالىق قاربىز، مۇنىڭ ءدامى ونشا ءتاتتى ەمەس. ال كەرىسىنشە، قاربىزدىڭ «كىندىگى» ۇلكەندەۋ بولسا، مۇنداي انالىق قاربىزدى العانىڭىزعا وكىنبەيسىز.

ەكىنشىدەن، ۇزىلگەن ساباعىنا ءمان بەرىڭىز. ساباعى قۋراپ كەتكەن قاربىز تولىق پىسكەن، ال ەگەر ساباعى جاسىلداۋ بولىپ تۇرسا، دەمەك، ونىڭ كۇنى ءالى جەتپەگەن دەگە ءسوز.

ءۇشىنشى ءمان بەرەتىن تۇس، ول قاربىزدىڭ جەرگە جاتىپ قالعان سارعىلتىم داعى، سول داق نەعۇرلىم ۇلكەن بولسا، قاربىزدىڭ پىسكەنىنە سوعۇرلىم كوزىڭىز جەتە تۇسەدى.

سونداي-اق، قاربىزدى شەرتىپ كورىڭىز، سول كەزدە قاتتى دىبىس ەستىلسە، ونى ساتىپ الۋعا بولادى، ەگەر كەرىسىنشە بولسا، الماي-اق قويعانىڭىز دۇرىس.

ارينە، اركىمنىڭ قاربىز تاڭداۋ ءتاسىلى ءارتۇرلى، ءبىز ءوز بىلگەنىمىزبەن بولىستىك، كادەڭىزگە جاراسىن!