سەبەبى، وقۋ ورنىن ءبىتىرۋى ءتيىس قىز-جىگىتتەردىڭ دەنى ەمتيحاننان شەكتى بالل جيناي الماي سۇرىنگەن.
تەستىلەۋگە قاتىسقان 426 ستۋدەنتتىڭ تەڭ جارتىسى وتپەي قالعان، دەپ حابارلايدى Almaty-akshamy.kz
الماتىدا جەكەمەنشىك مەديسينالىق كوللەدج ستۋدەنتتەرى ديپلومىن الا الماي ءجۇر. ءبىراق ستۋدەنتتەر مۇنى وزدەرىنەن ەمەس، تەستتى دايىنداعان ورتالىقتان كورىپ وتىر.
كتك تەلەارناسىنىڭ حابارلاۋىنشا، قارلىعاش جولشىبەكوۆانىڭ ەكى بالاسى وسى كوللەدجدى بيىل ءبىتىرىپ، ديپلوم الۋ كەرەك بولعان. ءبىراق ۇلدارى قورىتىندى مەملەكەتتىك اتتەستاسيالاۋدىڭ العاشقى كەزەڭىنەن سۇرىنگەن. بۇعان ول تەستىلەۋ ورتالىعىن كىنالاپ وتىر. ايتۋىنشا، تەست سۇراقتارىنىڭ قۇرىلىمى دۇرىس بولماعان.
«اقشا تولەپ قاتىسقان تەستتەن 80-90 بالل الىپ جۇرگەن. اسكەرگە شاقىرىپ جاتىر. پوۆەستكا كەلىپ قويعان. كوللەدجدەن جىلدا انىقتاما الىپ بەرەمىز عوي، ونىڭ مەرزىمى شىلدەدە ءبىتتى. ءتورت بالاعا جاردەماقى الاتىنبىز، ول دا توقتاپ قالدى. ءبىزدىڭ سۇراقتارىمىزدىڭ ىشىندە زاڭنىڭ سۇراقتارى ءجۇر دەيدى. تۇسىنىكسىز، اۋدارماسى انىق ەمەس، تۇسىنبەيمىز دەپ ايتتى»، - دەدى قارلىعاش جولشىبەكوۆا.
جيىلعاندار اراسىندا بولاشاق ءتىس دارىگەرلەرى، جالپى تاجىريبەلىك دارىگەرلەر مەن پەدياتر ماماندارى بار. ولار دا تەستىلەۋدە بەرىلگەن سۇراقتار مۇلدە تۇسىنىكسىز دەپ وتىر. ال قايتادان تاپسىرۋعا جارتى جىلدان كەيىن عانا مۇمكىندىك بەرىلگەن. تەك ول ۋاقىتتا ستۋدەنتتەردىڭ ءبىرى جوعارعى وقۋ ورنىنا تۇسە الماي قالامىز دەسە، ەكىنشىسى ديپلومسىز اسكەرگە الىپ كەتەدى دەپ ۋايىمدايدى. سول سەبەپتى قايتا تاپسىرۋ ۋاقىتىن جاقىنداتسا دەگەن ءوتىنىش بار.
«ءبىز جۇمىس ىستەي المايمىز. سەبەبى بىزدە ديپلوم جوق. ءبىز ستۋدەنت رەتىندە دە سانالمايمىز. جىگىتتەردى اسكەرگە الىپ كەتۋى مۇمكىن. وتە كوپ ستۋدەنت جوعارعى وقۋ ورنىنا تۇسكىسى كەلگەن. ولار دا وقۋىن ارى قاراي جالعاستىرا الماي وتىر. ءبىز بۇلاي جارتى جىل كۇتىپ وتىرعىمىز كەلمەيدى. بىزگە قايتا تاپسىرۋ ۋاقىتىن ەرتەرەك جاساپ بەرسىن. مەن ءوز ماماندىعىم بويىنشا جۇمىس ىستەگىم كەلەدى»، - دەدى رۋفينا اليموۆا.
جالپى تەستىلەۋگە 426 ستۋدەنت قاتىسقان ەكەن. ونىڭ تەڭ جارتىسى وتپەي قالعان. كوللەدج باسشىلىعى بۇل ىسكە ارالاسا المايتىنىن، ستۋدەنتتەردەن تەستىلەۋدى تاۋەلسىز ەمتيحان ورتالىعى العانىن ايتتى.
«سوڭعى سىناق تاپسىراتىن تەستتەر بىزگە اشىق ەمەس. ءبىز ونى بىلمەيمىز قانداي سۇراقتار كەلىپ جاتقانىن. ءبىز تەستتى بىلمەيتىن بولعاننان كەيىن وعان باعا بەرە المايمىز. ءبىز سول تۋرالى دەنساۋلىق مينيسترلىگىنە جازدىق تا، ايتتىق تا. ەندى ول كىسىلەر قانداي شەشىم قابىلدايدى، ءبىز بىلمەيمىز»، - دەدى مەديسينالىق-ستوماتولوگيالىق كوللەدجدىڭ ديرەكتورى ساۋىربەك رۋزۋددينوۆ.
ال تەست ورتالىعىنداعىلار ءبارىنىڭ تالاپقا ساي ەكەنىنە سەنىمدى. سۇراقتار الدىن الا دايىندالىپ، بىلىكتى مامانداردىڭ تەكسەرىسىنەن وتكەن دەيدى ولار.
«ەمتيحاندا قولدانىلعان ورىس جانە قازاق تىلىندەگى تەست سۇراقتارى 2023 جىلدىڭ مامىر ايىندا تەستولوگيالىق جانە مازمۇندىق ساراپتامادان وتكىزىلدى. قازاق تىلىنە اۋداراتىن مامان يەلەرىنىڭ بىزدە ەكى ءتۇرى بار. ولاردىڭ مەديسينالىق ءبىلىمى بار جانە مەملەكەتتىك ءتىلدى باعالايتىن قازاقشا تەست بويىنشا لينگۆيست ماماندار بىزدە جۇمىس ىستەيدى»، - دەدى «ۇلتتىق تاۋەلسىز ەمتيحان ورتالىعىنىڭ» مامانى مارجان ءشارىپوۆا.