پەتروپاۆلدا ءبىر توپ وقۋشى قاتارلاس قىزدى جۇيەلى تۇردە ۇرىپ-سوعىپ، اقشا بوپسالاعان، - دەپ حابارلايدى aqshamnews.kz Todayinfo-عا سىلتەمە جاساپ.
وقيعانىڭ ۆيدەوسى جەلىگە تارادى. كادرلاردان التى قىزدىڭ قاتارلاسىن ۇرىپ-سوعىپ جاتقانىن كورۋگە بولادى. ءارقايسىسى كەزەك-كەزەك جابىردەنۋشىنىڭ باسىنان ۇرىپ، كەتىپ قالادى. ءجاسوسپىرىم سوققىلارعا قارسىلىق كورسەتپەيدى. ولار قىزدى ۇرىپ-سوققان سوڭ اقشا سۇرايدى. قىزدار قاتارلاسىنان فيزيكالىق زورلىق نەمەسە "قولما-قول اقشا" بەرۋدى تاڭداۋدى ۇسىنادى.
سوققىعا جىعىلعان قىز بۇعان دەيىن ولاردىڭ بىرىنە قارسى ارىز جازباق بولعان. وسىدان كەيىن بۇزاقى قىزدار ونى وسىلاي جازالاماق بولعان.
"قايتارماساڭ، كاسساعا قويامىز. تۋعان كۇنىڭ توعىزىنا. ءبارىبىر اقشا الاسىڭ. ونىنشى كۇنى قايتارماساڭ، توپپەن كەلىپ ۇرىپ ءولتىرىپ، ەسەپكە قويامىز"، – دەيدى وقۋشى قىزدار.
جاسوسپىرىمدەر مۇنىڭ ءبارىن ۇيالى تەلەفونعا ءتۇسىرىپ العان. مالىمەتكە سايكەس، وقيعا وتكەن جىلدىڭ تامىز ايىنىڭ سوڭىندا بولعان. ءبىراق بۇل ءىس كەيىنىرەك قوعام نازارىنا ىلىكتى.
سولتۇستىك قازاقستان وبلىستىق پوليسيا دەپارتامەنتىنىڭ مالىمەتىنشە، پەتروپاۆل پوليسەيلەرى 14 جاستاعى قالا تۇرعىنىنا قاتىستى قورقىتۋ دەرەگى بويىنشا جان-جاقتى تەكسەرۋ جۇرگىزىپ جاتىر.
"جۇرگىزىلگەن جەدەل-ىزدەستىرۋ ءىس-شارالارىنىڭ ناتيجەسىندە ءبىر توپ قىزدىڭ جۇيەلى پسيحولوگيالىق جانە فيزيكالىق قىسىم كورسەتكەنى انىقتالدى. ونىڭ ىشىندە ۆيدەوعا جازىلعان اقپارات راستالدى. 2024 جىلعى 31 تامىزدا بولعان وقيعاعا قاتىسى بار التى كامەلەتكە تولماعان بالانىڭ جەكە باسى انىقتالدى. ەكى كامەلەتكە تولماعان جانە ءتورت زاڭدى وكىلگە قاتىستى اكىمشىلىك ماتەريالدار جينالدى. بوپسالاۋ دەرەگى بويىنشا قوسىمشا سوتالدى تەرگەۋ باستالدى. بارلىق پروسەستىك ارەكەت زاڭ اياسىندا جانە قاداعالاۋ ورگانىنىڭ قاداعالاۋىمەن جۇزەگە اسىرىلادى"، – دەلىنگەن حابارلامادا.