سولتۇستىك قازاقستان وبلىسىندا 13 اۋىل ىشىمدىكتەن تۇبەگەيلى باس تارتقان، - دەپ حابارلايدى aqshamnews.kz "حابار" ارناسىنا سىلتەمە جاساپ.
ىشىمدىكتەن باس تارتقان اۋىلداردىڭ ءبىرى – قازاقستان مەن رەسەي شەكاراسىنداعى سۋلىشوق اۋىلى. مۇندا 50-گە جۋىق ءۇي ءتۇتىن تۇتەتىپ وتىر. قايماعى بۇزىلماعان ەل ۇلكەندەردىڭ وسيەتىن قاشاندا قۇپ العان.
"اراق-شاراپ ساتپايتىن اۋىل بولايىق دەپ، بايسالدى اۋىل بولايىق دەپ جانە دە تويلاردا اراق-شاراپ بولماسىن دەپ، جاستارعا ەرتەڭ ۇلگى بولسىن دەپ وسىنداي شەشىم قابىلدادىق. يگى باستامالار ءبىزدىڭ الدىمىزدا وبلىس بويىنشا ءجۇرىپ جاتىر عوي. سولاردى ءبىز قولداپ، قاريالار ءبارىمىز اقىلداسىپ، بايسالدى اۋىل بولايىق دەدىك"، – دەدى سۋلىشوق اۋىلىنىڭ تۇرعىنى توقتامىس جانبۇتەنوۆ.
سۋلىشوق اۋىلىندا اراق-شاراپ ساتىلمايدى. توي-جيىندار دا ىشىمدىكسىز وتەدى. بۇل قۇقىق بۇزۋشىلىقتاردىڭ الدىن الۋعا مۇمكىندىك بەردى، دەيدى تۇرعىندار. ەلدى مەكەندە سوڭعى جىلدارى ۇرلىق-قارلىق سەكىلدى قىلمىستار تىيىلعان.
"جاستارىمىز ءقازىر الكوگولدىك ىشىمدىكتەردى قولدانبايدى. جانە ولار كوبىنەسە ءوزىنىڭ قازىرگى قازاقي تۇرعىدا، ءوزى قازاقى اۋىلدا تۇرعاندىقتان، وزدەرىنىڭ قازاقىلىقتارىن جوعارى دەڭگەيدە ساقتايدى. ءبىزدىڭ وكرۋگتىڭ ءوزى ۋچاسكەلىك پوليسيا بولىمىمەن تىعىز بايلانىستا جۇمىس ىستەيمىز"، – دەدى وسپەن اۋىلدىق وكرۋگىنىڭ اكىمى ساراگۇل بەيسەنبايەۆا.