«پەتروگليف ىزشىلەرى» قورىنىڭ ەرىكتىلەرى 2025 جىلى 27 ەكسپەديسياعا شىعىپ، الماتى، جامبىل مەن جەتىسۋ وبلىسىندا پەتروگليفتەردىڭ 11 جاڭا شوعىرىن، سونداي-اق بۇرىن بەلگىسىز بولىپ كەلگەن ەرتە تەمىر ءداۋىرى مەن تۇركى كەزەڭىنە جاتاتىن ونداعان قونىس پەن قورىمدى، XVIII–XIX عاسىرعا تيەسىلى قازاقتىڭ وننان استام رۋلىق زيراتىن انىقتاعان.
وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا وسىلار تۋرالى بايانداپ بەردى، - دەپ حابارلايدى Aqshamnews.kz.
قور وكىلدەرىنىڭ ايتۋىنشا، بيىل عىلىمي ورتاعا بۇرىننان بەلگىلى جەرلەردىڭ وزىنەن ءبىراز جاڭا پەتروگليف تابىلعان. جالپى العاندا، ارحەولوگيالىق ەسكەرتكىشتەر تىزىمىنە ەنبەگەن جيىرماعا جۋىق قورىم تىركەلىپتى وسى جولى. كورعانداردىڭ جالپى سانى 300-دەن اسادى. ولاردىڭ اراسىندا امانبوكتەر شوعىرىنداعى پەتروگليفتەر، بايانجۇرەك ماڭىنداعى جاڭا توپ، سونداي-اق قىزىلاعاش اۋىلىنىڭ ماڭىنداعى جازىق پەن جەتىسۋ وبلىسىنىڭ اقتەكشە اۋىلى جانىنداعى مۇقىر شاتقالىنان تابىلعان جارتاستاعى سۋرەتتەر دە بار.
ەرىكتىلەردىڭ ايتۋىنشا، زەرتتەۋگە شالعايداعى اۋىل تۇرعىندارى دا كوپ ۇلەس قوسقان. الەۋمەتتىك جەلى مەن باق-تا ۇنەمى كورىنىپ وتىراتىندىقتان، قورعا اۋىل تۇرعىندارىنان وسىنداي ورىندار تۋرالى ءبىراز حابارلاما كەلىپ ءتۇسىپتى. بۇل تاسادا قالعان قانشاما ەسكەرتكىشتىڭ تابىلۋىنا مۇمكىندىك بەردى.
قوردىڭ اتقارۋشى ديرەكتورى ولگا گۋميروۆا: «پەتروگليف ىزشىلەرى» جوباسىنداعى ەڭ باستى رەسۋرس – ادام. قورىمىزدا ەرىكتى بولىپ جۇرگەندەردىڭ ءارقايسىسى ءارتۇرلى سالادا كەلگەن. اسىرەسە، جىل وتكەن سايىن ىزدەۋ جۇمىسىنا اۋىل مەن الىس ەلدىمەكەننىڭ تۇرعىندارى كوپ ارالاسىپ جاتقانىن كورىپ قۋانىپ قالاسىڭ. اركىم ءوزىنىڭ تۋعان جەرىنىڭ تاريحىن بۇكىل الەم بىلسە ەكەن دەيدى عوي. بۇل – ناعىز پاتريوتيزم»، - دەيدى ولگا گۋميروۆا.
كوماندا ەلىمىزدىڭ تاريحي-مادەني مۇراسىن دا ناسيحاتتايدى: 2025 جىلى سەگىز اشىق لەكسيا، بەس باسپا ءسوز تۋرى مەن بالالارعا ارنالعان ءۇش ءىس-شارا وتكەن.
«قازاقستان – پەتروگليفتەر ەلى» جوباسىنىڭ نەگىزىن قالاعانداردىڭ ءبىرى يۋريي دوروحوۆ اعارتۋشىلىق جۇمىستىڭ ماڭىزىنا توقتالدى: «PR سالاسىنىڭ مامانى رەتىندە ايتارىم: قازاقستاندا قانداي تاريحي قازىنا جاسىرۋلى جاتقانىن حالىق نەعۇرلىم كوبىرەك بىلسە، ناعىز پاتريوتتار دا سوعۇرلىم كوپ شىعار ەدى. بۇل اسىرەسە جاستارعا وتە كەرەك دۇنيە».
جيىندا ەسكەرتكىشتى باقىلاۋ مەن تىركەۋدەن باستاپ، جەرگىلىكتى تۇرعىندارعا ولاردى ساقتاۋ ەرەجەلەرىن تۇسىندىرۋگە دەيىنگى ەرىكتىلەردىڭ ارحەولوگيالىق نىسانداردى قورعاۋ باعىتىندا جاساپ جاتقان جۇمىسى دا ايتىلدى.
قورىتىندىلاي كەلە، قوعام بەلسەندىلەرى 2026 جىلعا ارنالعان جوسپارىن دا ايتتى. كەلەر ماۋسىمدا ولار جاڭادان انىقتالعان پەتروگليف شوعىرلارىن زەرتتەۋدى جالعاستىرىپ، ەشكىولمەس كەشەنىنىڭ ۆيرتۋالدى 3D-تۋرىن جاساپ، جاڭا بارلاۋ ەكسپەديسيالارىن وتكىزۋدى دە جوسپارلاپ وتىر.