ىشكى ىستەر ءمينيسترىنىڭ ورىنباسارى اباي قايىربەكوۆ پەريزات قايراتتىڭ تۇزەۋ مەكەمەسىندە قانداي قىزمەتكە ورنالاساتىنى جانە ونى اناسى عايني الاشبايەۆامەن ءبىر كولونياعا جىبەرۋ مۇمكىندىگى تۋرالى سۇراقتارعا جاۋاپ بەردى، - دەپ حابارلايدى Aqshamnews.kz ءتىلشىسى Tengrinews.kz-كە سىلتەمە جاساپ.
پەريزات قايرات قايدا جۇمىس ىستەۋى مۇمكىن؟
اباي قايىربەكوۆتىڭ ايتۋىنشا، پەريزات قايراتتىڭ ەڭبەككە ورنالاستىرىلۋى ونىڭ داعدىلارى مەن قولجەتىمدى ۆاكانسيالارعا بايلانىستى ايقىندالادى.
"ونى قاي جەرگە ورنالاستىرا الاتىنىمىزدى، سايكەس بوس ورىنداردى قارايمىز. ەگەر بىلىكتىلىگى جەتىسپەسە مۇنداي سوتتالعاندارعا قاجەتتى وقىتۋ جۇرگىزىلەدى"، - دەدى ول.
قاجەت بولعان جاعدايدا پەريزات قايراتتى تۇزەۋ مەكەمەسى جانىنداعى كوللەدجدە نەمەسە كۋرستاردا وقىتۋ قاراستىرىلاتىنىن قوستى.
ءبىر كولونياعا ەتاپتاۋ مۇمكىن بە؟
ۆيسە-مينيستردىڭ تۇسىندىرۋىنشە، اناسى مەن قىزىن ءبىر كولونياعا ەتاپتاۋ مۇمكىن. الايدا ولاردى ءبىر بولىمشەدە، الدە ءارتۇرلى وتريادتا ۇستاۋ ماسەلەسىن مەكەمەنىڭ ءوزى وپەراتيۆتىك جاعداي مەن قاۋىپسىزدىك تالاپتارىن ەسكەرە وتىرىپ شەشەدى.
"مەكەمە ىشىندە ورنالاستىرۋ كەزىندە بۇل ماسەلەلەر ەسكەرىلەدى. ءبىر وتريادتا ما، الدە ءارتۇرلى وتريادتا ما جازاسىن وتەيتىنى — وپەراتيۆتىك جاعدايعا بايلانىستى شەشىلەدى"، - دەدى ول.
بۇعان دەيىن نە بولدى؟
2024 جىلعى قاراشادا پەريزات قايرات تاسقىننان زارداپ شەككەندەرگە كومەك رەتىندە جينالعان 1،5 ملرد تەڭگەدەن استام قاراجاتتى جىمقىردى دەگەن كۇدىكپەن ۇستالدى. تەرگەۋ مالىمەتىنشە، قاراجاتتىڭ ءبىر بولىگى ەليتالىق جىلجىمايتىن مۇلىك، كولىك جانە قىمبات ساپارلارعا جۇمسالعان. سونداي-اق ول اقشانى قولما-قول جاساۋ ءۇشىن تانىستارى مەن تۋىستارىن تارتتى دەگەن اقپارات بولدى.
كەيىن قارجى مونيتورينگى اگەنتتىگى پەريزات قايراتتىڭ تاعى ءبىر ەپيزود بويىنشا، پالەستينا حالقىنا گۋمانيتارلىق كومەك رەتىندە جينالعان قارجىنى جىمقىرۋعا قاتىسى بولۋى مۇمكىن ەكەنىن حابارلادى.
اقىرىندا پەريزات قايرات 10 جىلعا باس بوستاندىعىنان ايىرۋ جازاسىنا كەسىلدى.