توسىننان بولعان تابيعي اپاتتار اۋىر زارداپتارعا اكەلۋى مۇمكىن. مۇنداي جاعدايدا كەلتىرىلگەن زالال ءۇشىن وتەماقىنى كىم جانە قالاي الا الادى؟ تولىعىراق aqshamnews.kz ماتەريالىندا.
ساراپشىلاردىڭ ايتۋىنشا، تەحنوگەن سيپاتتاعى توتەنشە جاعدايلاردان كەلتىرىلگەن زياندى وتەۋ زالال كەلتىرۋشى تاراپتان ەرىكتى تۇردە نەمەسە سوت شەشىمىمەن جۇزەگە اسىرىلادى. بيۋدجەت قاراجاتى ەسەبىنەن وتەماقى زارداپ شەككەندەردىڭ ەڭ تومەنگى قاجەتتىلىكتەرىن قاناعاتتاندىرۋ شەگىندە تولەنەدى.
زارداپ شەككەندەر نەمەسە ولاردىڭ زاڭدى وكىلدەرى تج بولعان كۇننەن باستاپ 13 كۇنتىزبەلىك كۇن ىشىندە جەرگىلىكتى اتقارۋشى ورگانعا ماتەريالدىق زالالدى وتەۋ تۋرالى ءوتىنىش بەرەدى. وتىنىشكە جەكە باسىن كۋالاندىراتىن قۇجاتتىڭ كوشىرمەسى جانە جوعالعان/بۇلىنگەن مۇلىك ءتىزىمى (تج سالدارىن جويۋ كەزەڭىن دە قوسا) قوسا تاپسىرىلادى.
ءوتىنىش ارنايى جۋرنالدا تىركەلىپ، قۇجاتتاردىڭ قابىلدانعانى تۋرالى تۇبىرتەك بەرىلەدى. ءوتىنىش 15 جۇمىس كۇنى ىشىندە قارالادى. تىركەلگەن كۇننەن باستاپ 10 جۇمىس كۇنى ىشىندە زالال مولشەرىن باعالاۋدى ۇيىمداستىرۋ ءۇشىن باعالاۋشى تارتىلادى، شىعىندار جاو ەسەبىنەن جۇرەدى. باعالاۋ زارداپ شەككەننىڭ قاتىسۋىمەن جۇرگىزىلەدى جانە مىنالاردى قامتيدى: باعالاۋشىنى تاڭداۋ؛ ۋاقىت پەن ورنىن كەلىسۋ؛ بۇلىنگەن مۇلىكتى باعالاۋ؛ ەسەپپەن تانىستىرۋ.
وتەماقى مولشەرى قالپىنا كەلتىرۋگە قاجەت شىعىندارعا، مۇلىكتىڭ زاقىمدانۋىنا بايلانىستى ۋسەنكاسىنا نەمەسە جوعالعان مۇلىكتىڭ نارىقتىق قۇنىنا نەگىزدەلەدى. قالپىنا كەلتىرۋ شىعىندارى سمەتا/كالكۋلياسيامەن راستالۋعا ءتيىس. مۇلىكتى قالپىنا كەلتىرۋ تەحنيكالىق مۇمكىن ەمەس نەمەسە ەكونوميكالىق ءتيىمسىز (شىعىندارى نارىقتىق قۇنىنىڭ 80%-ىنان اسسا) بولسا، مۇلىك جويىلعان دەپ تانىلادى.
باعالاۋشى قورىتىندىسىنان كەيىن 3 جۇمىس كۇنى ىشىندە جاو قاراجات ءبولۋ تۋرالى شەشىم قابىلدايدى. تولەم شەشىم قابىلدانعاننان كەيىن 30 كۇنتىزبەلىك كۇن ىشىندە جۇرگىزىلەدى. داۋلى جاعدايلار سوت تارتىبىمەن شەشىلەدى.
ەگەر تۇرعىن ءۇي قاجەت بولسا، نە ىستەۋ كەرەك؟
تۇرعىن ءۇي الۋ ءۇشىن جاو-عا مىنا قۇجاتتارمەن جۇگىنۋ كەرەك:
- جەكە كۋالىك كوشىرمەسى؛
- بەلگىلەنگەن نىسانداعى ءوتىنىش (جىلجىمايتىن مۇلىك يەسىنەن)؛
- تۇرعىن ءۇيدىڭ تەحنيكالىق ءتولقۇجاتى؛
- جەر ۋچاسكەسىنە سايكەستەندىرۋ قۇجاتى (جەكە مەنشىك اكتىسى)؛
- «ازاماتتارعا ارنالعان ۇكىمەت» بەرەتىن جىلجىمايتىن مۇلىكتىڭ بار/جوعى تۋرالى انىقتاما.
ەگەر تج جەكە نەمەسە زاڭدى تۇلعالاردىڭ كىناسىنەن تۋىنداسا، زالالدى وتەۋ مىندەتى كىنالى تاراپقا جۇكتەلەدى.
كوشكىن قاشان بولادى جانە مۇندايدا نە ىستەۋ كەرەك؟
كوشكىنگە كوپ فاكتور اسەر ەتەدى: نوسەر، قاردىڭ جاپپاي ەرۋى، جەر سىلكىنىسى، تاۋدىڭ ەتەگىن سۋ اعىنى شايىپ كەتۋى.
ەگەر نىسان (ءۇي، ساياجاي) تاۋلى جەردە ورنالاسسا، اۋماقتى جۇيەلى تۇردە تەكسەرىپ تۇرىڭىز: جارىق، جىلجۋ، توپىراقتىڭ شامادان تىس ىلعالدانۋى، قۇبىر جەلىلەرىنىڭ اقاۋى، سۋدىڭ جەر بەتىنە شىعۋى بار-جوعىن قاراڭىز. كوشكىن ءقاۋپى تۋرالى دابىل العاندا ەلەكتر، گاز قۇرالدارىن، سۋ جۇيەسىن ءوشىرىڭىز، ءقاۋىپسىز جەرگە ەۆاكۋاسيالانىڭىز. قاجەت بولسا، قۇتقارۋشىلارعا ءۇيىندى استىنان ادامداردى قازىپ الۋ مەن العاشقى كومەك كورسەتۋگە جاردەمدەسىڭىز.