پەدياتريا ورتالىعىندا بالالار كۇنى اتاپ ءوتىلدى.
پەدياتريا جانە بالالار حيرۋرگياسى عىلىمي ورتالىعىندا حالىقارالىق بالالاردى قورعاۋ كۇنىنە وراي، قاتەرلى دەرتكە جانە سيرەك كەزدەسەتىن اۋرۋلارعا شالدىققان بالالار ءۇشىن «بار مەيىرىمىمىز بالالارعا!» اتتى مەرەكەلىك شارا ءوتتى، دەپ حابارلايدى Almaty-akshamy.kz.
ايتۋلى مەرەكەگە ارنالعان شارانى پەدياتريا ورتالىعىنىڭ باسقارما ءتوراعاسىنىڭ عىلىمي جانە يننوۆاسيالىق قىزمەتتەر جونىندەگى ورىنباسارى ليازات مانجۋوۆا اشىپ، بارشا قاۋىمدى كەلە جاتقان بالالار كۇنىمەن قۇتتىقتادى. جازدىڭ العاشقى كۇنىمەن تۇسپا-تۇس كەلەتىن بالالار مەرەكەسىمەن سونىمەن قاتار، پبحعو رەسپۋبليكالىق بالالار ونكولوگياسى جانە گەماتولوگيا ورتالىعىنىڭ جەتەكشىسى گۇلنار ءابدىلوۆا، «حالىق» قايىرىمدىلىق قورىنىڭ ديرەكتورى باعىنبەك شۋنكەيەۆ، ماقان ەسبولاتوۆ اتىنداعى ىشكى ىستەر مينيسترلىگى اكادەمياسىنىڭ وكىلى ينديرا شامشييەۆا قۇتتىقتاپ، اقجارما تىلەكتەرىن ءبىلدىردى.
مەرەكەلىك شارا «ءمارمار» ونەر ورتالىعى وقۋشىلارىنىڭ ورىنداۋىنداعى كۇمبىرلەگەن كۇيمەن اشىلدى. مەرەكەگە ۇلى اباي ءوڭىرىنىڭ بەلگىلى انشىلەرى داستان قاليقان ۇلى، بولاتبەك ىسقاق، شىنبولات ۇزاقباي، ەركەبەك پەن ءاليا اۋكەنوۆالار ارنايى قاتىسىپ، ءان شاشۋلارىمەن بالالارعا مەرەكەلىك كوڭىل-كۇي مەن قۋانىش سىيلادى. پەدياتريا ورتالىعىندا ەم الىپ جاتقان بالالاردى قولداۋعا «Melisa Brand» ستۋدياسىنىڭ ءانشىسى ءازيزا نۇرباقىت قىزى، «كيندەر» حورەوگرافيالىق ءانسامبلى مەن «Baglan Abdraim» ونەر ورتالىعىنىڭ جاس ونەرپازدارى دا كەلىپ، ءوز ونەرلەرىن پاش ەتتى. كوپشىلىكتى ماقان ەسبولاتوۆ اتىنداعى ىشكى ىستەر مينيسترلىگى اكادەمياسى كۋرسانتتارىنىڭ ونەرى ءتانتى ەنتى. ولاردىڭ ورىنداۋىندا پاتريوتتىق اندەر شىرقالىپ، ارنايى فلەشموب كورسەتىلدى.
بالالار ءۇشىن ءتۇرلى مولتەك فيلم كەيىپكەرلەرىمەن فوتوسەسسيالار ۇيىمداستىرىلدى. قازاقستاندىق قور بيرجانىڭ دەمەۋشىلىگىمەن كەلگەن انيماتورلار بۇلدىرشىندەردىڭ كوڭىلىن كوتەرىپ، ءتۇرلى ويىندار وينادى.
مەرەكەلىك شارا سوڭىندا دەمەۋشىلەر تاراپىنان بارشا بالاعا سىيلىقتار تاراتىلدى.
شارا بارىسىندا پەدياتريا ورتالىعىنىڭ №2 ونكوگەماتولوگيا بولىمىندە ەم الىپ جاتقان بالالاردىڭ اتا-انالارى ءسوز سويلەپ، بارشا دەمەۋشىلەرگە العىستارىن ءبىلدىردى.
پەدياتريا ورتالىعىندا ەم الىپ جاتقان بارلىق بالاعا زور دەنساۋلىق، مول باقىت، باقىتتى بالالىق شاق، قۋانىش پەن شاتتىققا تولى جارقىن ءومىر تىلەيمىز! بالالار مەرەكەسى قۇتتى بولسىن!
اۋىر دەرتكە شالدىققان بالالارعا مەرەكە، قۋانىش سىيلاپ، اتى جامان اۋرۋدى جەڭۋگە دەگەن سەنىم ۇيالاتۋعا ۇمتىلعان شارانىڭ پسيحولوگيالىق كومەگى زور دەپ بىلەمىز.
بۇل تاراپتا مەرەكەلىك شاراعا اتسالىسقان بارشا دەمەۋشىلەرگە العىسىمىزدى بىلدىرەمىز! بيىل بالالار ءۇشىن مەرەكە قازاقستان قور بيرجاسى، «اميلا»، «حالىق» قايىرىمدىلىق قورلارى، ق ر ىشكى ىستەر مينيسترلىگى اكادەمياسى، «سوسا سولا» جانە ت.ب. كومپانيالاردىڭ دەمەۋشىلىگىنىڭ ارقاسىندا ءوتتى.