بيىل ءساۋىر ايىندا باستالعان «پەداگوگيكالىق يدەيالار پانوراماسى-2024» رەسپۋبليكالىق بايقاۋىنىڭ وڭىرلىك كەزەڭى باستالدى.
ەلىمىزدىڭ بارلىق وڭىرىنەن بايقاۋعا قاتىسۋ ءۇشىن 170 ءوتىنىش كەلىپ تۇسكەن. ولاردىڭ ىشىندە ءپان مۇعالىمدەرى، باستاۋىش سىنىپ پەن مەكتەپكە دەيىنگى ءبىلىم بەرۋ ۇيىمدارىنىڭ پەداگوگتەرى بار، دەپ حابارلايدى Almaty-akshamy.kz وقۋ-اعارتۋ مينيسترلىگىنە سىلتەمە جاساپ.
بايقاۋدىڭ ماقساتى – ەلىمىزدىڭ ۆيرتۋالدى ءبىلىم بەرۋ كەڭىستىگىندەگى اۆتورلىق قۇقىقپەن قورعالعان بەينەرەسۋرستار بانكىن تولىقتىرۋ، زاماناۋي پەداگوگيكالىق تاجىريبە مەن مۇعالىمدەر اراسىنداعى ءوزارا ارەكەتتەستىكتىڭ وزىق تاجىريبەلەرىن تاراتۋ جانە ناسيحاتتاۋ.
كونكۋرستىڭ باعىتتارى: ەرتە ساۋاتتىلىق (مەكتەپكە دەيىنگى تاربيە جانە وقىتۋ)، وقۋ ساۋاتتىلىعى، ماتەماتيكالىق ساۋاتتىلىق، جاراتىلىستانۋ-عىلىمي ساۋاتتىلىق، سيفرلىق ساۋاتتىلىق، مەديا-اقپاراتتىق ساۋاتتىلىق، قارجىلىق ساۋاتتىلىق، ەكولوگيالىق ساۋاتتىلىق، دەنساۋلىق ساقتاۋ ساۋاتتىلىعى (مەديسينالىق ساۋاتتىلىق)، الەۋمەتتىك-ەموسيونالدى ساۋاتتىلىق، مادەنيەتارالىق ساۋاتتىلىق جانە ازاماتتىق-قۇقىقتىق ساۋاتتىلىق.
«پەداگوگيكالىق يدەيالار پانوراماسى» رەسپۋبليكالىق بايقاۋى پەداگوگتەر اراسىندا وتە تانىمال. بەينەماتەريالداردى باعالاۋ ءۇشىن ءار وبلىستا وڭىرلىك ساراپتامالىق كەڭەستەر قۇرىلدى، ولار ءار باعىت بويىنشا جۇلدەگەرلەردى انىقتايدى. ءبىرىنشى ورىن العان پەداگوگتەردىڭ جۇمىستارى YouTube-تەگى ورلەۋ ءبىلىم بەرۋ ارناسىندا جاريالانادى. وسىلايشا، ۇزدىك پەداگوگيكالىق تاجىريبەلەر بارلىعىنا قولجەتىمدى بولادى»، – دەيدى وقۋ-اعارتۋ مينيسترلىگى «ورلەۋ» بىلىكتىلىكتى ارتتىرۋ ۇلتتىق ورتالىعىنىڭ باسقارما ءتوراعاسى ايدانا شيليبەكوۆا.
وڭىرلىك جانە رەسپۋبليكالىق كەزەڭدەردىڭ بارلىق قاتىسۋشىلارى جانە جەڭىمپازدارى سەرتيفيكاتتارمەن، 1، 2، 3 دارەجەلى ديپلومدارمەن ماراپاتتالادى. YouTube-تە ەڭ كوپ قارالعان بەينەماتەريال ءۇشىن ءار باعىت بويىنشا ىنتالاندىرۋ سەرتيفيكاتى بەرىلەدى. كونكۋرستىڭ بارلىق ماراپاتتاۋ قۇجاتتارى قازاقستان رەسپۋبليكاسى وقۋ-اعارتۋ ءمينيسترىنىڭ 2024 جىلعى 2 ساۋىردەگى №72 بۇيرىعىنا سايكەس بىلىكتىلىك ساناتىن تاعايىنداۋ نەمەسە راستاۋ ءۇشىن اتتەستاسيادان ءوتۋ كەزىندە ەسكەرىلەدى.
كونكۋرستىڭ ەرەجەسىمەن تانىسىپ، وڭىرلىك كەزەڭگە قاتىسۋ ءۇشىن ءوتىنىمدى 15 قازانعا دەيىن https://ppi.orleu-edu.kz سايتىندا بەرۋگە بولادى. قوسىمشا اقپارات الۋ ءۇشىن «ورلەۋ» بىلىكتىلىكتى ارتتىرۋ ۇلتتىق ورتالىعىنىڭ وبلىستىق جانە شىمكەنت، الماتى، استانا قالالارىنىڭ فيليالدارىنا حابارلاسىڭىز.