بۇعان دەيىن ءبىرقاتار بۇزۋشىلىقتارعا جول بەرىلۋىنە بايلانىستى ءىس قۇجاتتارى قۇزىرلى ورگانعا كەرى قايتارىلعان بولاتىن، دەپ حابارلايدى Almaty-akshamy.kz.
ايىپتالۋشىلاردىڭ اراسىندا رولدەردى، كەلتىرىلگەن زالالدى جانە تاعى باسقاسىن سيپاتتاۋ كەزىندە قىجك-نىڭ ەلەۋلى بۇزۋشىلىقتارىنا جول بەرىلگەنىنە بايلانىستى ءىس پروكۋراتۋراعا قايتارىلدى. الايدا سوت القاسى قىلمىستىق ءىستى قايتارۋ تۋرالى قاۋلىنىڭ كۇشىن جويۋ تۋرالى قاۋلى شىعاردى جانە ونى قىلمىستىق ىستەر جونىندەگى مامانداندىرىلعان اۋدانارالىق سوتقا (سمۋس) قاراۋ ءۇشىن جولدادى.
"2023 جىلدىڭ 1 قاڭتارىنان باستاپ سىبايلاس جەمقورلىق قىلمىستار جايلى ىستەرگە قاتىستى ايىپتاۋ اكتىسىن پروكۋرور تولتىرادى، ال سوتقا دەيىنگى تەرگەپ-تەكسەرۋ ورگانى تەك سوتقا دەيىنگى تەرگەپ-تەكسەرۋدىڭ اياقتالعانىن جەتكىزىپ، ەسەپ وتكىزەدى. اپەللياسيالىق ساتىدا پروكۋرور سوت القاسىنا جاڭا ايىپتاۋ اكتىسى تولتىرىلعانىن، وندا الدىندا جىبەرىلگەن قاتەلىكتەر تۇزەتىلگەنىن، ايىپتاۋدىڭ ءمانى تولىق كولەمدە سيپاتتالعانىن، سەنىپ تاپسىرىلعان مۇلىكتى اسا ءىرى مولشەردە، ياعني سوتتالۋشىلاردىڭ الدىن الا ءسوز بايلاسۋى ارقىلى بوتەننىڭ مۇلكىن ۇرلاۋ بويىنشا ويلارى ءبىر بولعانىن جەتكىزدى"، - دەپ حابارلادى پاۆلودار وبلىستىق سوتىنىڭ باسپا ءسوز قىزمەتى.
ءبىرىنشى ساتىدا وڭىرلىك پوليسيا دەپارتامەنتىنىڭ بۇرىنعى باستىعى نۇرلان ماسىموۆكە قاتىستى پارا الۋ، سەنىپ تاپسىرىلعان بوتەن مۇلىكتى يەمدەنۋ نەمەسە ىسىراپ ەتۋ، ق ر مەملەكەتتىك شەكاراسىن قاساقانا زاڭسىز كەسىپ ءوتۋ فاكتىسى بويىنشا تىركەلگەن قىلمىستىق ءىستىڭ الدىن الا سوت تىڭدالىمى ءوتتى. سونىمەن قاتار ءىس بويىنشا دەپارتامەنت باسشىسىنىڭ بۇرىنعى ورىنباسارى دامير سيرازيديموۆ تا ايىپتالۋشى بولىپ سانالادى، وعان پارا الۋ، سەنىپ تاپسىرىلعان بوتەن مۇلىكتى يەمدەنۋ نەمەسە ىسىراپ ەتۋ بويىنشا ايىپ تاعىلعان. سونداي-اق، كاسىپكەر ەۆگەنيي ەۆكوۆيچ سەنىپ تاپسىرىلعان بوتەن مۇلىكتى يەمدەنۋگە نەمەسە ىسىراپ ەتۋگە كومەكتەسكەنى ءۇشىن سوتتالىپ جاتىر.
بۇعان دەيىن سوتقا دەيىنگى تەرگەۋ ورگانى بۇرىنعى جوعارى لاۋازىمدى پوليسەيلەرگە "مەملەكەتتىك ساتىپ الۋدى وتكىزۋ جانە ۇلەستەس كومپانيالارمەن كەلىسىمشارتتارعا قول قويۋ كەزىندە قامقورلىعى ءۇشىن 90،3 ملن تەڭگە سوماسىندا پارا الدى جانە 420 ملن تەڭگە سوماسىندا بيۋدجەت قاراجاتىن ۇرلادى" دەگەن ايىپ تاعىلعانى حابارلاعان بولاتىن.