حالىقتى ەۆاكۋاسيالاۋ جانە ۋاقىتشا ورنالاستىرۋ ءۇشىن ءتورت ەۆاكۋاسيالىق پۋنكت دايىندالدى.
تۇركىستان وبلىسىنىڭ ورداباسى اۋدانىنداعى «نايمان» جانە «قۇرتاي» كانالدارىنان تاسىعان سۋ ارىس وزەنىنە قۇيىلىپ جاتىر، دەپ حابارلايدى Almaty-akshamy.kz توتەنشە جاعدايلار مينيسترلىگىنىڭ باسپا ءسوز قىزمەتىنە سىلتەمە جاساپ.
تۇركىستان وبلىسىنىڭ اكىمى دارحان ساتىبالدى ساۋران اۋدانىنداعى سۋ تاسقىنىنا بايلانىستى وزگە دە اۋدان، قالالارداعى جاعدايدى سارالاۋ ماقساتىندا توتەنشە جاعداي دەپارتامەنتىندە شتابتىڭ شۇعىل كەڭەسىن وتكىزدى. جيىنعا توتەنشە جاعداي دەپارتامەنتى مەن پوليسيا دەپارتامەنتىنىڭ باسشىلىعى، باسقارما باسشىلارى قاتىستى. ءوڭىر باسشىسى قازىرگى احۋالعا توقتالىپ، تاسقىن سۋ سالدارىن جويۋ جانە قاۋىپسىزدىك شارالارىن كۇشەيتۋ جونىندە تاپسىرما بەردى.
«سۋ تاسقىنىنىڭ الدىن الۋ بويىنشا جوسپارلار جاسالىپ، ءتيىستى جۇمىستار قولعا الىندى. ءقاۋىپتى ايماقتارعا تەحنيكا مەن كۇشتى جۇمىلدىرىپ جاتىرمىز. ءبىراق جاۋىن-شاشىننىڭ مولشەردەن ارتىق ءتۇسۋى، اۋا رايىنىڭ كۇرت جىلىنۋىنان قاردىڭ تەز ەرۋى بىرنەشە اۋىلدى ابىگەرگە سالىپ وتىر. كەشە وبلىستاعى سۋ نىساندارى مەن وزەندەردى قاراپ شىقتىق. بارلىق اۋدان، قالادا كۇشەيتىلگەن رەجيمدە جۇمىس جالعاسىپ، قاۋىپسىزدىك شارالارى ساقتالۋى ءتيىس»، – دەگەن دارحان ساتىبالدى ءار اۋداندا، اۋىلدا كەلتىرىلگەن شىعىندى ەسەپتەۋ بويىنشا ارنايى كوميسسيالار جاساقتاۋدى تاپسىردى.
تۇركىستان وبلىسى بويىنشا توتەنشە جاعدايلار دەپارتامەنتىنىڭ باستىعى نۇرعالي ءجۇنىسوۆ سۋ تاسقىنىنا بايلانىستى سوڭعى دەرەكتەردى باياندادى. ونىڭ ايتۋىنشا، بارلىق اۋدان، قالادا جۇمىس كۇشەيتىلىپ، سۋ نىساندارى باقىلاۋعا الىنعان. جاۋىن-شاشىن كوپ تۇسۋىنە جانە قاردىڭ ەرۋىنە بايلانىستى بايدىبەك، ساۋران، ورداباسى اۋداندارىنداعى بىرنەشە اۋىلداعى ۇيلەردىڭ اۋلالارىن سۋ باستى. ەرىگەن قار سۋى 15 ەلدى مەكەندەگى كوشەلەر مەن اۋلا ۋچاسكەلەرى ارقىلى اعىپ ءوتتى. قازىرگى تاڭدا 13 كوشە، 186 اۋلا اۋماعى، 1 تۇرعىن جەكە ۇيگە سۋ كىرگەن. تجد كۇشىمەن سۋ باسقان اۋلا اۋماعىنان 154 ادام جانە 200 باس ۇساق مال ەۆاكۋاسيالانعان. ول ادامدار تۋىستارىنىڭ ۇيلەرىنە جايعاستى. حالىقتى ەۆاكۋاسيالاۋ جانە ۋاقىتشا ورنالاستىرۋ ءۇشىن ساۋران اۋدانىندا 4 ەۆاكۋاسيالىق پۋنكت دايىندالدى.
توتەنشە جاعدايلار مينيسترلىگىنىڭ مالىمەتىندە، وبلىستىق ماڭىزى بار 11 اۆتوموبيل جولىنىڭ 23 ۋچاسكەسىندە سۋ جينالعان. ورداباسى اۋدانىنداعى نايمان جانە قۇرتاي كانالىندا سۋ دەڭگەيى كوتەرىلدى، قازىرگى ۋاقىتتا سۋ ارىس وزەنىنە قۇيىلۋدا. ۇيلەردى سۋ باسۋعا جول بەرمەۋ ماقساتىندا 2500 بىرلىك كولەمىندە قاپشىقتاردى توسەۋ جۇمىستارى جۇرگىزىلۋدە. مايدانتال اۋىلىندا سۋدى قاشىرتۋ ءۇشىن جاساندى كانالدار قازىلىپ، اۋلا ۋچاسكەلەرىن سۋ باسۋ ءقاۋپى سەيىلدى. قازىرگى ۋاقىتتا قۇرباندار مەن زارداپ شەككەندەر جوق. جاۋىن-شاشىن وبلىس اۋماعىندا توقتادى. الايدا سۋ اعىنى جالعاسۋدا. سۋدى قاشىرتۋعا بارلىعى 308 ادام، 51 بىرلىك تەحنيكا، 25 موتوپومپا، 1 ءجۇزۋ قۇرالى جۇمىلدىرىلدى.
ءوڭىر باسشىسى بىرنەشە باسقارما باسشىسىنىڭ وسى جاعدايعا بايلانىستى اتقارعان جۇمىستارىن سارالادى. تاپسىرمالار بەردى. قۇرىلىس باسقارماسى تاراپىنان سۋ باسقان اۋىلدارعا تەحنيكالار جىبەرىلگەن. قوعامدىق دەنساۋلىق باسقارماسىنىڭ باسشىسى جەدەل مەديسينالىق كومەك بريگادالارى جاساقتالعانىن مالىمدەدى. اۋىل شارۋاشىلىعى مەن جول سالاسىنا جاۋاپتى باسقارما باسشىلارى جولداردى رەتكە كەلتىرۋ، اۆتوبۋسپەن قامتۋ، وبلىسقا تيەسىلى كانالداردى ءتيىمدى پايدالانۋ باعىتىنداعى جۇمىستاردى باياندادى.