پاۆلوداردا 9 جاستاعى بالا 3-قاباتتاعى بالكوننان قۇلاپ كەتتى، - دەپ حابارلايدى aqshamnews.kz ءتىلشىسى.
بۇل وقيعا جايلى وڭىرلىك بالا قۇقىقتارى جونىندەگى ۋاكىل ساۋلە شاكەنوۆا ايتتى. وقيعا 19 شىلدە كۇنى كەشكە بولعان.
ءقازىر بالا جانساقتاۋ بولىمىندە جاتىر.
"2016 جىلى تۋعان، ەرەكشە ءبىلىم بەرۋدى قاجەت ەتەتىن بالا ءۇشىنشى قاباتتا ورنالاسقان ورتاق كىرەبەرىس بالكونىنان قۇلاعان"، – دەدى شاكەنوۆا.
كۋاگەرلەردىڭ ايتۋىنشا، بالا ەكىنشى قاباتتىڭ توبەسىندەگى جاپپاعا قۇلاعان. ونى جەدەل جاردەم دەرەۋ اۋرۋحاناعا جەتكىزگەن.
وبلىستىق بالالار اۋرۋحاناسىنىڭ مالىمەتىنشە، بالادا اۋىر جاراقاتتار انىقتالعان:
"بالادا كاتاتراۆما، ەكىنشى دارەجەلى تراۆماتيكالىق شوك، جابىق باس-سۇيەك مي جاراقاتىن العان، ميى شايقالعان، كوكىرەك قۋىسىنىڭ جاراقاتى بار، قول سۇيەگى سىنعان، ىشكى اعزالارى زاقىمدانى تىركەلدى"، – دەپ حابارلادى دارىگەرلەر.
دارىگەرلەردىڭ ايتۋىنشا، بالانىڭ جاعدايى اۋىر.
بۇل اۋرۋحاناعا ءبىر كۇن بۇرىن اقسۋ قالاسىنان 2 جاستاعى ءسابي دە جەتكىزىلگەن.
"بالانىڭ اناسىنىڭ ايتۋىنشا، 18 شىلدەدە كەشكى ساعات 20:00 شاماسىندا ۇلى جەكە ءۇيدىڭ تەرەزەسىنەن قۇلاپ كەتكەن. قۇلاۋ بيىكتىگى شامامەن 1،5 مەتر. بالا جابىق باس-سۇيەك مي جاراقاتىن العان، ميى شايقالعان، جەلكە سۇيەگىنىڭ ويىق سىنىعى بار. 19 شىلدەدە باس سۇيەگىنە ترەپاناسيا جاسالدى"، – دەدى دارىگەرلەر.
ءقازىر ءسابي اۋرۋحانانىڭ تراۆماتولوگيا بولىمىندە جاتىر.
"بالانىڭ جاعدايى اۋىر، ءبىرقالىپتى"، – دەدى دارىگەرلەر.
بيىل جىل باسىنان بەرى پاۆلودار وبلىسىندا 11 بالا تەرەزەدەن قۇلاپ كەتكەن، ولاردىڭ ەكەۋى قازا تاپقان. جاراقات العانداردىڭ كوپشىلىگى 5 جاسقا دەيىنگى بالالار.
پوليسيا مەن قۇتقارۋشىلاردىڭ ايتۋىنشا، بالالاردىڭ تەرەزەدەن قۇلاۋى جاراقات الۋدىڭ جانە ءولىم-جىتىمنىڭ نەگىزگى سەبەپتەرىنىڭ ءبىرى بولىپ وتىر. قايعىلى وقيعالاردى بولدىرماۋ ءۇشىن ماماندار بولمەنى جەلدەتۋ كەزىندە بالالاردى قاراۋسىز قالدىرماۋعا، بالكونعا ۇلكەندەردىڭ ەرتۋىنسىز شىعارماۋعا، تەرەزە ماڭىنا جيھاز قويماۋعا جانە ۇيىقتاپ جاتقان بالانى جالعىز قالدىرماۋعا كەڭەس بەرەدى. تەرەزەلەرگە قاۋىپسىزدىك بلوكيراتورلارىن نەمەسە ارنايى تورلار ورناتۋ ۇسىنىلادى.