ىشكى ىستەر مينيسترلىگى پاۆەل دۋروۆتىڭ كولساي كولىندە شومىلۋىنا بايلانىستى جاۋاپكەرشىلىك ماسەلەسىن قازاقستاننىڭ ەكولوگيا جانە تابيعي رەسۋرستار مينيسترلىگى شەشەتىنىن مالىمدەدى، دەپ حابارلايدى Aqshamnews.kz Tengrinews.kz تىلشىسىنە سىلتەمە جاساپ.
نە جاعداي بولدى؟
"ۆكونتاكتە" مەن Telegram مەسسەندجەرىنىڭ نەگىزىن قالاۋشى پاۆەل دۋروۆ كولسايدا سۋعا شومىلىپ، جەلى قولدانۋشىلارىنىڭ نارازىلىعىن تۋدىرعان ۆيدەو جاريالادى. "كولساي كولدەرى" ۇلتتىق پاركىندە بۇل سۋدا شومىلۋعا تىيىم سالىنعانى ايتىلىپ، قىزمەتتىك تەكسەرىس باستالعانى حابارلاندى.
ۇلتتىق پاركتىڭ تابيعي كەشەندەردى قورعاۋ جانە كوبەيتۋ بولىمىندە بەلگىلەنگەن ەرەجەلەردى بۇزعانى ءۇشىن 10 ايلىق ەسەپتىك كورسەتكىش مولشەرىندە ايىپپۇل قاراستىرىلعانى، 2025 جىلى ونىڭ كولەمى 39 320 تەڭگە ەكەنىن اتالدى.
ءىىم نە دەيدى؟
ءىىم اكىمشىلىك پوليسيا كوميتەتى ءتوراعاسىنىڭ ورىنباسارى الەكسەي ميليۋك تىيىم سالىنعان ايماقتاعى شومىلۋعا قاتىستى جاعدايدى ءتۇسىندىرىپ، بۇل ماسەلە بويىنشا جاۋاپكەرشىلىكتى ەكولوگيا مينيسترلىگى ايقىندايتىنىن مالىمدەدى.
"تىيىم سالىنعان ايماقتا شومىلۋ ەرەكشە قورعالاتىن تابيعي اۋماقتا بولعان جاعداي. وسى ايماقتا شومىلۋعا قاتىستى جاۋاپكەرشىلىك، سونداي-اق حاتتاما جاساۋ جانە ايىپپۇل سالۋ ەكولوگيا مينيسترلىگىنىڭ قۇزىرەتىنە جاتادى. ءبىز ءتيىستى ماتەريالدى تىركەپ، ۆەدومستۆولىق ارەكەت بويىنشا جىبەردىك. ءقازىر ولار ءىستى قاراپ جاتىر"، - دەدى الەكسەي ميليۋك.
ونىڭ ايتۋىنشا، ءىىم قىزمەتكەرلەرى بۇل فاكتى بويىنشا اكىمشىلىك ماتەريالدار راسىمدەمەگەن، تەك باق-تا جاريالانعان مالىمەتتەردى جيناپ، ەكولوگيالىق ۆەدومستۆوعا جولداعان.
"ءبىزدىڭ قۇزىرەت - قوعامدىق ءتارتىپتى ساقتاۋ، جول قاۋىپسىزدىگى، بالىق جانە ورمان شارۋاشىلىعى ماسەلەلەرى. ءار مەملەكەتتىك ورگاننىڭ اكىمشىلىك حاتتاما جاساۋ بويىنشا ءوز قۇزىرەتى بار. بۇل جاعدايدا قۇزىرەت ەكولوگيالىق ورگاندارعا تيەسىلى"، - دەپ ناقتىلادى ول.
ايىپپۇل مولشەرىنە قاتىستى ءىىم وكىلى ءبارى قۇقىقبۇزۋشىلىقتىڭ سارالانۋىنا بايلانىستى بولاتىنىن ايتتى: "قالاي سارالاناتىنىن قاراۋ كەرەك. ەڭ تومەنى - ەسكەرتۋدەن، قاتەلەسپەسەم، 10 اەك-كە دەيىن بولادى"، - دەدى مامان.
ەسكە سالايىق، بۇعان دەيىن پاۆەل دۋروۆ الماتى وبلىسىنداعى كولساي كولىندە سۋعا تۇسكەن ۆيدەوسىن جاريالاعان ەدى.