الماتىدا تىكەلەي ينۆەستيسيا قورىن قۇرۋ تۋرالى ءۇشجاقتى كەلىسىمگە قول قويىلدى. سالتاناتتى ءراسىم حالىقارالىق New Vision Forum 2025 فورۋمىنىڭ اياسىندا ءوتتى، - دەپ حابارلايدى اqshamnews.kz.
كەلىسىمگە Almaty Creative كرەاتيۆتى يندۋستريالاردى دامىتۋ ورتالىعى، Freedom Holding Corp. جانە VPE Capital Fund Management Limited قول قويدى.
Creative Capital Fund قورى كرەاتيۆتى يندۋستريالاردا كاسىپكەرلىكتى دامىتۋعا، الماتىداعى جوعارى شىعارماشىلىق الەۋەت پەن وڭىرلىك ەرەكشەلىكتى ەسكەرە وتىرىپ، جاڭا مۇمكىندىكتەر اشۋعا باعىتتالعان.
«قوردىڭ ينۆەستيسيالارى ەكسپورتتىق الەۋەتى جوعارى باعىتتارعا – كينووندىرىس (بەينە جانە انيماسيا سالالارىن قوسا العاندا)، مۋزىكا، IT جانە گەيمديەۆ، ساۋلەت، ديزاين جانە سيفرلىق مەديا سالالارىنا شوعىرلانادى»، – دەدى الماتى قالاسى اكىمىنىڭ ورىنباسارى ولجاس سماعۇلوۆ.
قوردىڭ باستاپقى كاپيتالى 21 ملرد تەڭگە، ونىڭ ىشىندە 10 ملرد تەڭگە – جەرگىلىكتى بيۋدجەتتەن، 11 ملرد تەڭگە – جەكە جانە شەتەلدىك ينۆەستورلاردىڭ قاراجاتىنان قۇرالادى.
قور استانا حالىقارالىق قارجى ورتالىعىنىڭ (AIFC) الاڭىندا قۇرىلىپ، اعىلشىن قۇقىعىنىڭ يۋريسديكسياسىندا جۇمىس ىستەيدى. قوردىڭ قىزمەت ەتۋ مەرزىمى – 10 جىل، ونىڭ ىشىندە 5 جىل ينۆەستيسيالىق، 5 جىل پوستينۆەستيسيالىق كەزەڭ رەتىندە بەلگىلەنگەن.
ايتا كەتەيىك، قالالىق تىكەلەي ينۆەستيسيا قورىن قۇرۋ باستاماسى قازاقستان پرەزيدەنتى قاسىم-جومارت توقايەۆتىڭ 2022 جىلعى 16 قاراشاداعى قولداۋىنا يە بولعان.
بۇل باستاما 2021–2025 جىلدارعا ارنالعان كرەاتيۆتى يندۋستريالاردى دامىتۋ تۇجىرىمداماسىندا جانە الماتى قالاسىن 2025 جىلعا دەيىن جانە 2030 جىلعا دەيىنگى ورتا مەرزىمدى دامۋ باعدارلاماسىندا كورىنىس تاپقان.
قوردىڭ باستى ماقساتى – الماتىلىقتاردىڭ شىعارماشىلىق يدەيالارىن تۇراقتى بيزنەسكە اينالدىرۋ جانە قالانىڭ كرەاتيۆتى يندۋستريالار ەكوجۇيەسىن دامىتۋ.