تىنىق مۇحيتىنداعى پاسحا ارالى پلاستيكالىق قالدىقتاردان زارداپ شەگىپ وتىر، دەپ حابارلايدى aqshamnews.kz.
بۇل مەكەن ءچيليدىڭ جاعالاۋلارىنا قاراعاندا ميكروپلاستيكپەن 50 ەسە كوپ لاستانعان. وسىنىڭ سالدارىنان ارالدا عاسىرلار بويى ساقتالعان ەسكەرتكىشتەر ءبۇلىنىپ، جويىلۋ الدىندا تۇر.
كوپشىلىككە تۇمسا تابيعاتىمەن تانىمال پاسحا ارالى بۇگىندە ەكولوگيالىق ءقاۋىپ قۇرساۋىندا. تىنىق مۇحيتىنداعى شاعىن مەكەن كەيىنگى جىلدارى ميكروپلاستيكتەن قاتتى زارداپ شەگۋدە. ونىڭ كولەمى بارعان سايىن ارتپاسا، كەمىمەگەن.
ونى باستى لاستاۋشى – بالىق اۋلاۋ كەمەلەرى. عىلىمي زەرتتەۋلەر جاعالاۋدا تابىلعان ميكروپلاستيكتىڭ باسقا ايماقتاردان كەلگەنىن كورسەتتى.
جەرگىلىكتى تەڭىز بيولوگى وسى جاعدايعا ايرىقشا نازار اۋدارىپ، بالىق اۋلاۋ كەمەلەرىنىڭ مۇحيتتى لاستاۋىمەن كۇرەسۋگە شاقىردى.
مويكو پاكوميو، تەڭىز بيولوگى: - پلاستيك قالدىقتار سۋ اعىسىمەن بىرگە كەلىپ، جاعالاۋلارعا شوگىپ قالادى. سودان كەيىن ىدىراپ، ميكروپلاستيككە اينالادى. بۇل زياندى بولشەكتەردىڭ باسىم بولىگى بالىق اۋلاۋ كەمەلەرىنەن تەڭىزگە تاستالعان قالدىقتار. ولار ارالداردىڭ ەكوجۇيەسىنە وراسان زور نۇقسان كەلتىرىپ جاتىر. قورشاعان ورتامىزدىڭ تازالىعىن ساقتاۋ – ءبىزدىڭ ورتاق جاۋاپكەرشىلىگىمىز. ءارقايسىمىز وسى ماسەلەگە نازار اۋدارىپ، ارەكەت ەتۋىمىز قاجەت.
پاسحا ارالىنىڭ مەرى پەدرو ەدمۋندستىڭ ايتۋىنشا، بۇل ماسەلە ارالدىڭ ەكوسجۇيەسىنە عانا ەمەس، حالىقتىڭ تۇرمىس تىرشىلىگىنە دە اسەر ەتىپ جاتىر.
پەدرو ەدمۋندس، پاسحا ارالىنىڭ مەرى: - پلاستيك مولشەرى بارعان سايىن كوبەيىپ، شىن مانىندە قورقىنىشتى جاعداي قالپتاسىپ وتىر. ول ءبىزدىڭ ومىرىمىزگە، كۇندەلىكتى تۇتىناتىن تاماعىمىزعا، قورشاعان ورتامىزعا كەرى اسەر ەتىپ جاتىر. جەرگىلىكتى بيلىك پەن تۇرعىندار ءقازىر پلاستيك قالدىقتارىمەن بەلسەندى كۇرەس جۇرگىزۋدە. ءبىراق ارال مەرى: «ماسەلەنى تەك الەم ەلدەرى بىرلەسىپ ارەكەت ەتسە عانا ءتيىمدى شەشۋگە بولادى»، - دەيدى.